Covid-19 vangin mi 612 thi tawh

Nimin khan tlai dar 5 thlengin Mizoramah Covid-19 vangin mi pahnih an thi a, January 31, Thawhṭanni zan khan mi pahnih an thi bawk a, an vaiin natna dang nei tel an ni. Mizoramah hripui vangin mi 612 an thi tawh a, kumin January thla bikah mi 65 an thi.

January 31, Thawhṭanni zan dar 8:10 khan Sangmawii (64), Pehlawn, Aizawl district chu State Refferal Hospital-ah a thi a, Covid-19 vei a ni tih January 30 khan hmuh chhuah a ni. Thawhṭanni zan vêk dar 10:30 khan Rosemi (74), Bairabi, Kolasib district chu SRH-ah a thi a, hripui vei a ni tih January 19, 2022 khan hmuh niin, January 23 aṭangin SRH-ah enkawl a ni.

Nimin zing dar 4:30 khan Thangbuta (81), Hmunhmelṭha, Champhai district khua chu Champhai DCHC-ah a thi a, Covid-19 positive a ni tih January 31 khan finfiah a ni. Rualkhuma (82), Hlimen Vengthlang pawh nimin chhun dar 12:15 khan hripui vangin an inah a thi a, Covid-19 vei a ni tih January 31, 2022 khan hmuh chhuah a ni.