Lirnghingin in eng emaw zat a tichhia

July 5, Pathianni tlai dar 4:26 khan magnitude 4.9-a náin Mizoramah lìr a nghîng a, East Tuipui biala chenna in eng emaw zat a tichhia. Lirnghing tuarte hi nimin khan Champhai DC aṭangin ṭanpuina pek an ni.

Lirnghing avang hian Dungtlang khuaah in 21 vel luah ngam lohin a awm a, mi eng emaw zat chu an inah an riah ngam loh avang­in community hall-ah an riak a, YMA-te'n silpauline zárin an riahna tur an siam bawk. Lirnghing vang hian in pakhat chu luah ngam a nih tawh loh avangin ṭhiah a ni tawh a, in pali vel ṭhiah leh tum mek a ni a; in khî leh siam ṭhat ngai 30 chuang a awm. Samthang leh Leisenzo khuaah pawh in chhia leh khì a awm nual bawk.

Champhai DC Maria CT Zuali chuan lirnghing vanga harsatna tâwkte ṭanpuina tur awm thei ang ang a ngaihtuah a, DC aiawhin additional DC Mark Lalthanliana hoin nimin khan ṭanpuina an sem. Lirnghing tuar nasa zual khua - Khuang­thing, Khawbung, Záwlsei, Dungtlang, Sâmthang, Vaphai, Farkawn khuaahte silpauline leh pawisa an pe ṭheuh a ni.