Police-in fimkhur turin mipui chah

Serchhip district additional SP Vanlalnghenga chuan nimin khan sumdawnna him lo laka fimkhur tur leh inhnamhnawih lo turin mipui a ngen a; sumdawnna pakhat an chhui zui chu chiahpuam kalphung nen a inzûl thu leh thubuai neih theihna a nih thu a tarlang.

Vanlalnghenga chuan, “Tunlai hian Pearlvine International intite’n membership fee Rs 2,250 chawi a, an sumdawnnaa member ni turin Serchhip leh khaw ṭhenkhatah mi an zawng mek tih hriat a ni a, crypto-currency hmanga sum peipunna hlâwk tak anga inchhálin downline member thar tur an zawng ṭhin tih hriat a ni,” a ti.

Serchhip Additional SP chuan, “Pearlvine International sumdawn-na hi a him lo hle a, Serchhip police-te’n an sumdawn dan kalphung an chhuina aṭangin tun hma chiahpuam kalpui dan (ponzi/pyramid scheme) nen a inang hle,” a ti a; thil hralh leh zawrh awm loin, downline member zawn hmuha point hmuh theihna hlâwk tak a nih thu leh, chutianga sumdawnna sum lú (capital) hmanga hna thawk si loa hlâwkna awm thei chi chu a him loh thu a tarlang a ni.