Covid-19 vei hmuh tam ber ní a thleng leh

January 31, Thawhṭanni khan Mizoramah Covid-19 vei mi 2,531 hmuh chhuah a ni a, Mizorama hmuh tam ber ní a ni. Nimin khan hripui vei dam tawh mi 2,318 chhuahtir an ni a, Covid-19 vei mi pahnih an thi.

Covid-19 vei Thawhṭannia hmuh tharte chu mipa 1,083 leh hmeichhia 1,448 an ni a; RT-PCR hmanga hmuh 556, TrueNAT hmanga hmuh 48, RAT hmanga hmuh 1,923 leh FIA hmanga hmuh pali an ni. Positivity rate chu 31.10% a ni a, mi 2,531 zinga mi 1,445-in symptom an nei.

Thawhṭannia Covid-19 positive hmuh thar 2,531 hi Mizorama hmuh tam ber ní a ni a, a hmaa hmuh tam ber ní, January 24 khan mi 2,222 hmuh chhuah a ni. Mi sang hnih aia tam hmuh chhuah ni li a awm tawh.

IPR tarlan danin, Thawhṭanni khan Covid-19 positive 30 aia tam hmuhna Aizawla veng 12 leh sikul pakhat a awm a, Aizawl pawn lamah khaw pahnih a awm thung. Mi 50 aia tam hmuhna veng pali - Chaltlang 67, Ramhlun North 65, Chhinga Veng 61 leh Bethlehem Vengthlang 60 a awm bawk.

Nimin tlai dar 5 thleng khan hripui vei dam tawh mi 2,318 chhuahtir an ni a; district tina chhuak zat chu - Aizawlah 1,487, Kolasib-ah 209, Saitualah 138, Lungleiah 124, Mamitah 116, Serchhipah 96, Khawzawlah 95, Champhaiah 38, Lawngtlaiah pasarih, Siahaah paruk leh Hnahthialah pahnih an ni.

IDSP record angin, Mizoramah Covid-19 vei 1,75,022 hmuh chhuah a ni tawh a, mipa 82,875 leh hmeichhia 92,147 an ni a, mipa aiin hmeichhia 9,272-in an tam zawk. Nimin tlai dar 5 thleng khan mi 1,61,642 (92.36%) chhuahtir an ni tawh a, mi 612 (0.35%) thi tawhin, enkawl mek mi 12,768 (7.29%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,75,022 chu mi 1,000 zelah hripui vei mi 159 an awm ang a ni a; mi 1,00,000 zela Covid-19 vangin mi 55 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 31, 2021 thlenga swab sample endik tawh 16,76,074 aṭanga RT-PCR hmanga endik zat percentage chu 20.65 a ni a, RAT hmanga endik zat chu 73.63% a tling.