Sorkar laipui health care scheme AB-PMJAY CM Hawla'n a hawng

Khawvela health care scheme lian ber tura ngaih, Ayushman Bharat - Pradhan Mantri Jan Arogya Yojana (AB-PMJAY) chu September 23, Pathianni khan prime minister Narendra Modi-a'n a hawng a; Mizoram atan pawh nimin khan chief minister Lal Thanhawla'n CMO pisa conference hall-ah a hawng.

Chief Minister chuan, AB-PMJAY kalpui a ni dawn ta chu lawmawm a tih thu sawiin, "Ramin a chhunga chengte hriselna a ngaih pawimawhzia a tilang. Mizoramah pawh health care hi sorkarin a ngai pawimawh a, sorkar laipui scheme kalpui mekin a huam lohte chhawmdawl an nih theih nan Mizoram Health Care Scheme (HCS) a kalpui a lo nih tawh a, HCS chu AB-PMJAY nen thlun zawm a ni tur hi a lawmawm hle a ni," a ti.

AB-PMJAY chu a mamawh leh scheme hnuaia awm theite'n zau zawka an hriata an hman ṭangkai ngei a duh thu sawiin CM Hawla chuan, "Sorkar pawhin a tih tur chinte ngawrh takin a ti zel. Chutihrual chuan, hriselna lamah Mizo mipuite'n hmalakna tur kan nei tam hle," a ti a; hnam hrisel zawk kan nih theih nan mi tinin an theih tâwkah ei leh in an uluk a, zûk leh hmuama an filhlim a pawimawh thu a sawi.

Health minister Lal Thanzara pawhin thu sawiin, "Ram mipuiin hriselna ṭha zawk kan neih theihna atan health care scheme changkang leh sum leh pai tam zawk hman theihna, sorkar laipuiin a duan thar hi kan chhawr ṭangkai ve theih dawn avangin, vawiin hi hriselna lam kawnga hun pawimawh leh, mellung pawimawh tak dang kan phun lehna ní a ni," a ti.

PMJAY hawnna inkhawmah hian Chief Minister chuan beneficiary ṭhenkhat hnenah AB-PMJAY Golden Record a sem nghal a ni.

AB-PMJAY hi RSBY thlakna tur scheme a ni a; RSBY hnuaiah kum khata Rs. 30,000 thleng bill theih ṭhin chu AB-PMJAY hnuaiah chuan kum khatah chhungkaw pakhatin Rs. 5,00,000 thleng bil theih a ni dawn. Sum sêng lo (cashless)-a inenkawl theihna tur a ni.

AB-PMJAY hi Mizoramah chuan chhungkaw 2,00,000 chuangin an hmang thei dawn a, India ram pumah mi nuai têlin an hman theih tur niin, khawvela sorkar hmalakna hnuaia hriselna lama inhumhimna leh invenna scheme lian ber tura ngaih a ni. Inziah luhnaah chhungkaw member zatah phal chin (limit) a awm lo.

AB-PMJAY hnuaia inziak lut theite chu - Socio Economic Caste Census 2011 list-a tel chhungkua te, RSBY smart card hmang mekte leh Mizoram sorkar scheme, Health Care Scheme (HCS)-a inziak lut tawh chhungkuate an ni a; RSBY-a tel lo, HCS-a inziak lut thei tan erawh chuan Rs. 1,500 chawi a ngai a, October 2018 chhungin mahni bial sub-centre-ah inziah luh tur a ni. Sorkar kum kal laiah chuan RSBY-a inziak lut tawh tan a thara registration tih a ngai lo.

PMJAY hnuaiah hian natna leh enkawlna 1350 chuang a awm a, kum khatah Rs. 5,00,000 thleng hman (bill) theih tih ni mah se, package rate bithliah ang zela bill siam tur a ni. Mizoram chhungah chuan sorkar damdawi-in leh private damdawi-in zawng zawnga hman theih tura ruahman a ni a, Mizoram páwna Mizoram sorkar empanelled hospital-ahte pawh pawh hman theih tura chhawpchhuah a ni bawk.

He scheme enkawl tur hian sorkar laipuiah National Health Agency din niin, Chief Executive Officer-in a enkawl a; state tinah State Health Agency din tur a nih angin, Mizoram State Health Care Society chu agency atan hman nghal a ni. Mizoramah chuan AB-PMJAY hi Health Care Scheme nen chhûn fin a ni ang.