Lo neituten hlâwk zawka an thar chhuah theih dan tur sawiho

ICAR-Research Complex for NEH Region, Mizoram Centre chuan nimin khan Aijal Club-ah Mizoram sorkar hnuaia agriculture kaih­hnawih department hrang hrang telna, 'Interface meeting on Adaptation Potential of Agricultural Technologies for Doub­ling Farmers’ Income in Mizoram' an buatsaih a; Finance minister Lalsawta leh Horticulture minister PC Lalthanliana ten an hmanpui.

Lalsawta chuan, Mizoram lo neitute'n lo neih dan kalphung hlui an la hman reng avangin a hlawk tur angin an la hlâwk pha lo nia sawiin, "Ram mipuite'n ei leh bar kan mamawh aṭanga 70% hi ram pawn aṭanga lak luh a nih avangin hmasawnna tur tam tak kan la bâk a ni. Kan lo neih dan kalphung hluite hi thiamna thar leh khawl ṭha zawk hmang a thlak a ngai a, chu chuan hlâwk zawk a thar chhuah kawngah lo neitute a puih mai bakah, eizawnna kawngah lo neitute a chawi sang dawn a ni," a ti.

Finance Minister chuan, hmasawn leh zel turin ram chhung leh páwn aṭangin investor hîp luh a hun tawh tih sawiin, "Magnetic Mizo­ram hmangin kawng hrang hrangah investor-te nen hmalak mek a ni a, agriculture-ah pawh hian chutianga hmalak chu a hun ve tawh a ni," a ti a; sorkar laipuiin kum 2022 hmaa lo neitute hlawkna a leta a pun theih nana hmalakna tihpuitlin a nih theihna atana theihtawp chhuah zel turin kal khawmte a sáwm.

PC Lalthanliana pawhin thu sawiin, "ICAR leh department hrang hrang hotute nena ṭangruala hetiang ang inhmuhkhawmna leh sawihona hun pawimawh an buatsaih thei hi a lawmawm hle. Zoram mipuite tana chhawrtlak leh hmantlak zawk rah chhuah a awm ngei ka beisei. Zoram loneituten ruahtui a an innghah nasat lutuk avang leh leilungah harsatna an neih ṭhin avanga an thar hlawk theih loa, hlawk zawka thar chhuak tur chuan technology thar nen a hmalak a pawimawh a ni," a ti.

Thu sawitu dang, ICAR Research Complex for NEH Region (Megha­laya) director Dr N Pra­kash chuan, kut hna­thawktute chawi sang turin agriculture lama thiamna tharte hman ṭangkai a pawimawh thu a sawi.

Sawihonaah hian Agriculture, AH & Vety, Fisheries, Horticulture, Soil and Water, Minor Irrigation, Sericulture, Commerce and Industries department aiawhte leh College of Veterinary Science, Selesih hotute an tel a; Mizoramin agriculture lama kan harsatna leh hma lak a nih theih dan tur an sawiho a ni.