E. Roll-a inziak lut vek turin ngen

Aizawl District Election Officer (DEO) chuan thuchhuah siamin, kum 18 tling tawh zawh zawngte chu electoral roll-ah inziak lut vek turin a ngen.

Aizawl DEO chuan India khua leh tui zawng zawngten India ram danpui (constitution) hnuaiah dikna leh chanvo kan nei vek tih tarlangin, "Heng dikna leh chanvote hi sorkar leh a kut leh ke hrang hrang hmangin humhalhsak kan ni. Heng zinga pawimawh ber pakhat chu Universal Adult Franchise (India khua leh tui dik tak, kum tling tawhte tana Inthlanna-a vote an thlak theihna) chanvo hi a ni. Hemi humhalh tur leh chanvo neituten an chanvo an chan ngei theih hi Election Commission of India (ECI) duhdan leh tum ber a ni, " a ti a, ECI chuan mitin ban phak inthlanna neih ngei ni se tih chu an duhdan a nih thu a sawi.

Universal Adult Franchise chanvo nei zawng zawngte tan (voh­bik te leh pianphunga harsatna nei zawng zawngte pawh huamin) inthlanna buatsaih tum a nih thu tarlangin Aizawl DEO chuan, "Hemi atan hian India khua leh tui, kum 18 tling tawh zawng zawngte electoral roll-a inziak lut turin kan ngen a ni. A tihhlawhtlin nan ERO/AERO leh BLO awmnaah rawn kalin electroal roll-a i inziah luh ngei theih nan an rawn pui dawn che a ni. Electoral roll-a i inziak lut tawh a nih chuan danpui hnuaia i dikna leh i chanvo i chan ngei theihna turin i vote hlu tak rawn thlak ve ngei turin ngen i ni," a ti.