District tihpuitlin tumnaa ti tak loah MNF puh District ramri turah lo buai suh se - Zoramthanga

MNF president Zoramthanga chuan nimin khan Mizo Hnam Rûna inkhawmah mi langsar ṭhenkhat a lawm lût a; thu sawiin, Congress party hotute chu district puan thar ramri turah buai lo turin a chah a, district ramri chu a chhehvel mipui duh dana siam an tum niin a sawi. Hetihlai hian Congress Legislature Party (CLP) treasurer Zodintluanga, minister chuan MNF chu district tihpuitlin an tumnaah an ti tak lo nia a hriat thu a sawi.

Zoramthanga chuan, Congress hruaitu ṭhenkhat chu MNF-in district tihhlawhtlin an tumnaa ramri turah an lo buai nia sawiin, "Lo buai suh se. Khaw hrang hranga mipui tam berte duh danin district ramri hi rîn a ni ang. Aizawl district hi a lian em em a, mipui tam takin DC office an bâwr ṭhin a, thil tih a har em em a ni. District headquarters khaw chhehvela mite hian district headquarters dâwr awl zawk hnuaia awm hi an duh rih lo a nih pawhin an duh thuaiin ka ring. Eng pawh ni se, khaw mipui tam ber duh danin district ramri hi siam a ni ang," a ti.

Congress sorkarin kum 1998-ah district panga an puang a, chu'ngte chu MNF sorkarin phunnâwi loin ṭha takin an tihlawhtling tih sawiin, "Kum 2008-ah keini'n district pathum kan puang a, sorkar notification-ah chhuah thlap a ni. Pu Hawla chuan Hnahthialah thu sawiin, 'Fûke kim loa piang district an pe che u a, keini chuan fûke kim kan pe dawn che u' tiin a intiam a. Fûke kima district pek tiam khan pheikhawk pakhat pawh an buntir leh si lo," a ti a; MNF an sorkar chuan district an puan tawh chu an tihlawhtling ngei dawn niin a sawi.

MNF President hian MZP hruaitu ni ṭhin mi ṭhenkhat an party-ah a lawm lut a, chu'ng zingah chuan MZP president hlui VL Krosshnehzova pawh a tel. Inkhawmah hian VL Krosshneh­zova pawhin thu a sawi a ni.

CLP treasurer Zodintluanga chuan, nimin khan a pisa-ah thu­thar thehdarhtute kawmin, MNF president Zoramthanga'n district an puan tawh chungchanga ramri rîn an tum dan a sawi chu pawlawh thlâk a tih thu leh, district pathum pek an tumnaah an ti tak tak (serious) lo hle nia a hriat thu a sawi.

Zodintluanga chuan MNF party-in kum 2018 inthlanpui atana an zawrh district pathum tihpuitlin an tum chungchangah an ti tak tak lo hlea a hriat thu a sawiin, "MNF CM candidate Pu Zoramthanga chuan vawiin khan Hnam Rûnah thu sawiin district pathum pek chungchang a sawi a. District boundary siam fel chungchangah tumah buai suh se, a bul hnaia khuate duh danin kan siam mai ang, tiin a sawi tih ka lo hria a. MNF party-te ram kaihhruai tum dan hi a pawlawhin kalpah mai maia district an puang hi a serious lo ka ti hle a ni," a ti.

MNF-in district pathum tihpuitlin an tum danah thil mumal leh fumfê a awm lo nia sawiin Zodintluanga chuan, "Pu Zoramthanga sawi ang hi a nih chuan, a khaw hnai khuate khan district lo duh lo se, MLA bial khata mi district hrang hrangah an awm a ngai dawn a, a duh lotu an tam viau phei chuan district khatah khaw tlemtê chauh an awm thei," a ti a; chuvang chuan ngaihtuahna tak tak an sêng lo a ni tih a chiang niin a sawi.

District siam tura tih ngai leh a hautak dan zawhna chhangin Zodintluanga chuan, "District pek tur a nih chuan, a khaw huam chin felfai tak rîn a ngai a, sub-division te, office building leh tihfel ngai tam tak a awm ka ring a ni," a ti.

CLP Treasurer chuan, MNF-in inthlan thlir ràna district pek chungchang an sawi chu Mizoram mipuiin an ring tak taka a rin loh thu sawiin, "Vawiina ka zawh nawn duh leh chu, kan ram an hmangaih a, district an puang tak tak duh a nih chuan, district mumal taka din dan leh a area puang ngam rawh se," a ti a; district area tur an puang ngam lo a nih chuan district tihpuitlin tumin mah se, an inzawrhna chu an ti tak tak ngam dawn lo tihna a nih thu a sawi.