Congress sorkar hi ICU-ah an awm mek - Lalduhoma

Ṭangrual pawl, Zoram Peoples' Movement (ZPM) chief ministerial candidate Lalduhoma chuan, Congress sorkar chu ICU-ah an awm mek a, nasa taka an damloh mek avangin beih an ngai lo niin a sawi.

Nimina ZPM pisaa inkhawmah thu sawiin ZPM CM candidate Lalduhoma chuan, “Congress sorkar kan hrawn mek hi beih an ngai lo a, an damlo a, ICU (intensive care unit)-ah an awm a, an marphû kan dek mek a ni. Chutih rualin, inthlanpui kan hmachhawn mekah hian heti khawpa Pathian leh kohhran dotute hi kan do ve a ngai dawn ta a ni," a ti.

Lalduhoma chuan, sorkarin sakhua duhsak bik a nei thiang lo a, political party tinte erawh chuan sakhaw behchhan an nei vek nia sawiin, "ZMP hi Chanchin Ṭha leh kohhran hote humhim tura din kan ni. Pathian leh kohhran ho hmusittute kutah Mizoram a kûn mek a ni," a ti a; 'Kohhran kan ráwn dawn lo' tih te, 'Zu zawrh hi kohhran ho

ṭawngṭai chhanna a ni' tia sakhaw puithiamte hmusittute chu roreltute ni leh turin Pathianin a ruat nawn leh tawh dawn lo tih ring turin mipui a chah.

ZPM CM Candidate chuan, MNF-te chu mi hausa ringawt candidate an zawn avangin Assembly constituency pakuaah an in ‘set’ hlum mek niin a sawi a; CM hlui Brig. T Sailo hmalak tawhna sawiin, "Aizawl West-I bial Sairanga sawhthing herna khawl a lo din tawh Congress sorkarin a tizuzi a, 'Ṭhenphunga damlai lung ka phun lo ang' titu hian engtin nge an tihhlamzuih tih hi ka zâwt a ni,” a ti.

Lalduhoma chuan, 15th. Finance Commission chairman NK Singh-a'n kum 2020-2025 Infrastructur Development Fund an buatsaih mekah rawtna siam tura a tih angin rawtna point 23 a thehluh tawh thu a sawi a, "Mizoram hi bul kan ṭan tlai avangin India ram pum state zingah kan hnufual a, Infrastructure Development Fund a hranpain min siamsak rawh u, a bik taka chawikan kan ngai a ni, tih leh thu dang pawimawh kan thlen tawh a ni," tiin, rawtna an thehluh tawh dan a sawi.

ZPM inkhawmah hian hunserh hmangtu Rev.Dr Lallawmzuala, Central KṬP leader chuan, ram rorelna chu Pathian ta a nih thu sawiin, "Development hlang hian hnam a dam thei lo a, rorelna leh Kristianna kal kawptir a ngai a ni. Ṭawngṭainaa kan chham angin, ramte, thiltihtheihna te, ropui te, chatuanin i ta a ni, tih ang hian Mizoram politics-ah seng luh a ṭul tawh tak zet a ni," a ti.