ACH trauma centre sakna tur lungphùm phúm

Nimin khan Aizawl Civil Hospital (ACH)-ah Finance minister Lalsawta'n Trauma Centre level-II sakna tur lungphùn a phúm a; Health minister Lal Thanzara chuan general ward leh private ward awmna building thar a hawng bawk.

Lung phûm leh building thar hawn pualah inkhawm buatsaihah Lalsawta chuan, Aizawl Civil Hospital chu damdawi-in hlun a nih angin, mipuiin kan pan nasat thu a sawi a, "Hospital tan hian hmasawnna ropui tak a ni. Trauma centre phei chu kan mamawh em em a, accident leh chhiatrupna thlen hunah a pawimawh hle a, nunna tam tak chhanhim theihna a ni," a ti.

Finance Minister chuan, 12th. Five Year Plan-ah district headquarters tinah trauma centre neih a nih theih nan dilna thehluh a nih thu sawiin, "District pasariha hmalakna turin first instalment pawh min rawn pe tawh a ni," a ti a; doctor-te chu natna chhuak thar zelte zir chiang a, hmasawn zel tum turin a chah.

Health minister Lal Thanzara chuan, hriselna ṭha nei turin hmasawnna ruhrel hrang hrang neih ṭhat a pawimawh tih sawiin, "NEDP kal­tlangin hmalakna tam tak a awm a, hmanraw changkang tak tak lei a ni. District hrang hrang hospital tihchangtlun nan kum 2016-17 ah cheng vbc. 9, kum 2017-18 ah cheng vbc. 20 leh kum 2018-19 atan cheng vbc. 20 dah a ni," a ti.

Sorkar thuchhuah tarlan danin, Mizoram sorkar chuan Aizawl Civil Hospital changtlung zawka thuam a nih theihna atan kum 2006-07 khan sorkar laipuiah dilna a theh­lut a; sorkar laipui chuan March 2007-ah cheng vbc. 54.23 hmanga tihchangtlunna tur a pawmpui a ni.

Damdawi-in ward building thar, chhawng nga hi December 15, 2014-ah sak ṭan niin, June 1, 2018-ah sak zawh a ni a, a sak nan cheng nuai 602 sen a ni.