KHAWTHLIR

Thisen pe
Sports & Youth Services directorate chuan nimin khan Aizawl Civil Hospital-ah blood donation camp an huaihawt a, college hrang hranga NSS volunteer-te'n thisen unit 112 an pe. Inter-College Youth Adventure Club pawhin Aizawl Civil Hospital-ah thisen unit 72 an pe a, a petute mipa 60 leh hmeichhia 12 an ni.

Entrepreneurship zir
Govt. Aizawl College (GAC)-a Commerce department leh Economics department leh, RUSA leh Indian National Fellowship Center, Mumbai-te chuan nimin khan GAC conference hall-ah entrepreneurship chungchang zirhona an buatsaih a; Commerce leh Economics zirlai 30-te leh zirtirtute an tel. State páwn lam mi mithiam pathumin entrepreneurship chungchang an zirtir a ni.

Party pahnih An zâmah ngai
PRISM party chuan thuchhuah siamin, nimin khan an party pisaah an party office bearer-te'n an hmalaknate an thlirho tih tarlangin, "Serchhip bialah party pahnih an zâm dêr tawh thu report ngaihthlak a ni," an ti. PRISM meeting-ah hian pawl ṭhenkhatin an huam chhunga PRISM candidate tur rawtna an siamte an thlirho a; rawtnate chu a theih anga tihhlawhtlin dan zawn ni se, an ti a ni.

Faina hnatlang
Champhai District Sanik Welfare & Resettlement Office leh ex-servicemen-te ṭangkawp chuan, Swachhata Hi Sewa hmalakna kal zelah nimin zing khan Champhai Vengthlang bazar huam chhung tifaiin an hnatlang a; chawhnu lamah zirlaite tan lemziak hmanga intihsiakna an buatsaih bawk.

Drone khap
Lawngtlai DC chuan thupek chhuahin, Myanmar leh Bangladesh ramri velah thla lakna khawl thlawk thei (drone) thlawk kual hmuh leh man a nih thu tarlangin, "Drone hi ram dang tana enthlatute leh hmelmate hmanraw ṭangkai a nih theih avangin, Lawngtlai district huam chhung Myanmar leh Bangladesh ramri velah drone chi reng reng thlawhtir khap a ni," a ti.