Mizoram NSS din champha lawm a ni

Nimin khan Vanapa Hall-ah Mizorama National Service Scheme (NSS) din champha vawi 49-na lawm a ni a, Higher & Technical Education (HTE) minister R Romawia'n a hmanpui.

R Romawia chuan, khawvel ṭhang zelah mahnia thil ṭha pumhmawm duhna a hluar zel laiin, mi dangte tana thil ṭha tih inzirtir uar deuh deuh a ṭul thu a sawi a, "Mite tana inphal nun hi hahthlak cháng awm mah se, nun hausa a ni. NSS kaltlanga zirlaite hnenah mi dangte tana inpekna, mi dangte nena inngeih taka nunho dan leh khawtlang ṭhat tlanna tur inzirtirna an kalpui hi thil ṭangkai leh hlâwk tak a ni," a ti.

HTE Minister hian State NSS Award for Programme Officers and Volunteers, 2017-18 chu Synod HSS-a progamme officer Joseph Vanlalhruaia Sailo hnenah a hlan.

NSS hi India ramah kum 1969 khan din a ni a, state leh university thlan bikah volunteer 40,000 nen bul ṭan a ni. Tun dinhmunah India ramah volunteer nuai 36 an awm tawh. Mizoramah chuan kum 1972 khan Pachhunga Memorial College (tuna Pachhunga University College)-ah din a ni a; kum 1996 aṭangin higher secondary school zirlaite zingah din leh a ni. Tun dinhmunah Mizorama college 26 leh higher secondary school 58-ah NSS a ding tawh a, a vaiin zirna-in 84-ah din a ni tawh a ni.

State NSS officer Dr Zirlianngura report-a a lan danin, April-September 2018 chhung khan NSS volunteer-te'n voluntary blood donation camp ṭum 35 an huaihawt a, chutah chuan thisen unit 2,534 an pe tawh. Thing 2,805 an phun tawh a, Lengpui Airport kalkawng Sihhmuiah Tourism department nen ṭangkawpin Saron kûng 300 an phun a ni.

Fai inzirtirna kawnga nasa takin hma an la a; sorkar leh vantlang hmun pawimawh - bazar, damdawi-in leh khelmualte tifaiin tun hnai thla ruk chhung khan vawi 150 an hnatlang hman a ni. Career, human rights, sanitation, legal, HIV/AIDS leh thil pawimawh dang dangah awareness campaign an nei ṭhin bakah, khawpui leh thingtlang hmun hrang hrangah chawlhbûk, zun-in leh khawtlang tana thil pawimawh an siam ṭhin bawk.