BEL-in ICCC siam hna an sawifiah

Bharat Electronic Limited (BEL) chuan Aizawl Smart City project hnuai­a Integrated Command and Control Centre (ICCC) atana an hmalakna chungchang thuchhuah siamin an sawifiah. ICCC atana hna inpek danah ZPM ṭhalai chuan cheng vbc. 41 vel chu tute'n emaw an fanghma no ei vangin a rîral ngei dawna an hriat thu leh tender chhuah ṭha tura sorkar an phût thu an lo tarlang tawh a ni.

BEL chuan, BEL chu public sector enterprise hman tlak loh anga tarlan chu thu dik lo nia sawiin, Ministry of Defence hnuaia ram tana ṭangkai leh thawk ṭha an nih avanga ‘Navratna’ status pek lai an nih thu an tarlang a, "IT, communications leh security system-ah defence, homeland leh thil dangah keini aia experience nei ṭha an awm lo," an ti.

Smart City Mission danga hna an thawhah an hmingchhia nia sawi chu thu dik lo nia sawiin BEL chuan, "Agra, Belagavi leh Delhi-ah hmingchhia anga an tarlang hi thu dik lo tawp a ni a, Agra leh Belgavi-ah chuan ICCC tluang taka zawh tawh niin, Covid-19 War Room-ah hman mek a ni," an ti a; Delhi-ah chuan stage-1 an zo tawh a, stage-2 atan Delhi sorkarin BEL a ruai chhunzawm mek niin an sawi.

Assam leh Meghalaya-a ICCC project-ah erawh chuan an la hnufûm hle tih sawiin, "Thuneitute nena indawrna a la kal zel a ni," an ti. BEL chuan, Aizawl Smart City hnuai­a ICCC project chu kum hmasa aṭangin an zir chian tawh thu leh ASCL mi te, Technical Committee on ICCC leh ASCL rawih project management consultant-te nen vawi tam tak zir chian leh sawiho a nih tawh thu an sawi a; project ṭha, man tláwm si duan chhuah a nih thu an tarlang.

BEL tarlan danin, Aizawl Smart City hnuaia ICCC project chu BEL kutah awm mah se, a thawhnaah system integrator ṭha neih a ngai ṭhin a, system integrator thlang tur chuan kaihhruaina hmangin request for proposal (RFP) chhuah a ni. BEL hnuaiah system integrator leh BEL-in an chanpual ve ve an thawk mai dawn niin an sawi.

Chinese bungrua hman tum anga ZPM ṭhalaiin an tarlan chungchangah BEL chuan, "Bungrua hman turte chu kan hun tawn leh sorkar laipui ngaih­tuahna hre chung leh, dan leh kaih­hruaina hrang hrang hmangin, duhsak leh hleih nei loin, a ṭha ber ber thlan a ni ang," an ti. An technical team kaltlangin state sorkar duh dan angin ICCC chu hmanrua ṭha ber hmangin a ṭha thei ang bera thawh an tum thu an tarlang bawk.