MNYF-in lei chim chhan puan an phût Kan tichhuak thuai dawn - PWD Minister

MNF ṭhalai (MNYF)-te chuan Sesawng leh Khawruhlian inkara Tuirini lei chim chhan puangzar turin PWD minister Lal Thanzara'n an phût. He an thil phût chungchangah hian nimin khan PWD Minister hmuh tumin CMO-a a pisaah an kal. Hetih lai hian, Lal Thanzara chuan, Tuirini lei chim chhan chhuina report chu tihchhuah thuai a nih tur thu a sawi.

MNYF-te hi mi 20 vel an thawk chhuak a, CMO gate chhungah an vaia luh phal a nih loh avangin police-te'n an lo dang. Mi 15 vel lut tura an inbiakrem hnuah an lut a, CMO building-ah erawh chuan mi panga luh phalsak an ni. MNYF-te chu vice president Lalremruata Chhangte hoin PWD Minister hmuh phalsak an ni a, mahse, Congress party ṭhalai leh Congress zirlai pawl NSUI hruaitu ṭhenkhatin awm ve an tum avangin an lut duh lo a, lehkha pek an tum chu Minister Private Secretary hnenah an pe a ni.

MNF ṭhalaite PWD Minister pisa aṭanga an chhuah a, CMO kawt záwla an awm laiin media interview neih chungchanga an inràwn khawm laiin Congress ṭhalai lamin ti lo tur an lo ti a; hei vang hian party pahnih ṭhalaite chu an inchháng lawk deuh a, buaina erawh a chhuak lo.

CMO-ah hian Congress party leh MPYCC mi leh sa ṭhahnem tak an awm a; MNF ṭhalai mi 20 vel CMO gate chhunga an luh vek phalsak an nih loh laia Congress mi ṭhahnem tak luh phalsak an nih chungchangah Aizawl South SDPO C Lalfakmawia chuan zawhna chhangin, an luh lai an hriat loh thu leh tute nge an nih an hriat loh thu leh, CMO gate bula an duty chhan tak zawk chu NHM hnuaia thawkte an punkhawm vang a nih thu a sawi.

MNYF-in PWD Minister hnena lehkha an thehluhah chuan, mi pakhatin a thih phahna leh mi dang pakhat a hliam phahna, February 13, 2018-a Tuirini lei chim chhan chhuitute'n May 23-ah an chhui chhuah report Mizoram sorkarah an thehlut tawh nia an hriat thu an ziak a, "An thehluh hnuah thla li dáwn a liam ta reng mai. Vawiin thlenga lei chim chhan chhui chhuahna puanzar a la ni lo hi pawi kan ti," an ti.

September 13-ah Tuirini lei chim chhan chhuina report chu September 2018 ral hma ngeia puangzar turin media kaltlangin an lo ngen tawh tih sawiin MNYF chuan, "Hei hi kan dinna a la ni reng," a ti a; nakin zelah lei chim chhiatna a thlen tawh lohna tura hmalakna ṭha zawk a awm theih nan lei chim chhan chu mipui hriatah puanzar ngei an phût thu an tarlang.

MNF ṭhalaite chuan, Upper Khatla-a MG Road chhia siamṭha tura sorkar hmalakna chu a muang hlea an ngaih thu sawiin, "February 16, 2018-a hna ṭan tawh, vawiin thlenga an hnathawh mek hmuh hian hei aia chak zawka hnathawh theih niin kan hria a, theihtawp chhuah turin kan beisei thar leh che a ni," tiin PWD Minister an hrilh.

MNYF chuan, Mizoramah inkalpawhna kawngpui hrang hrang a ṭha lo hle nia sawiin, khua a ṭhál leh dawn tawh a, kawng chhe thawmṭhat kawngah tun aṭanga inruahman turin an chah bawk.

PWD minister Lal Thanzara chuan nimin khan Republic Veng Congress unit-in an veng community hall-ah Republic Veng Congress Local Council thar lawmna inkhawm an buatsaihah Tuirini lei chim chhan chhuina report chu tihchhuah thuai a nih tur thu sawiin, a pisaah thil danglam tak a thlen thu a sawi a, "PWD Minister zawng zawnga a ngaihna hre lo ber min titu MNF ṭhalaite'n min hmuh an duh a ni," a ti.

Lal Thanzara chuan, MNYF-te chu ṭum hnih/thum lut tura an koh pawhin an lut duh lo tih sawiin, "Ziakin an thil hriat duh an lo dah a, tun thla chhunga Tuirini lei chim chhuina report tichhuak turin min duh a ni," a ti a; a PS chu MNYF hnenah an thil duh chu a rang thei ang bera tihchhuah a nih tur thu hrilh turin a chah niin a sawi.

PWD Minister chuan, MNYF-te'n PWD minister ni tawh zinga a ngaihna hre lo bera an puhna chu a pawm thu sawiin, "An sorkar laia PWD minister-te anga contractor-te hnen aṭangin 3%, 10%-te lâk nacháng ka hre ve lo. PMGSY hna tam tak a awm a, a hmu turte hnenah 3% lain, bill lak dawnah 10% an la leh a ni. Contractor-in hna an thawhchhiat phah a, ramin a tawrh phah a ni," a ti.