Bru chhungkaw 17-te Tlabungah dah rih
Tun hnaia Tripura aṭanga Mizorama Bru hruai kîr chhungkaw 17-te chu September 23, Pathianni zan dar 7 vel khan Tlabung thlenpui an ni a, tunah hian Tlabung Zodin venga an awm lailâwkna tur siamah an awm mek.
Bru chhungkaw 17-te puitgling 47 leh naupang 20 niin, an vaiin mi 67 an ni a, Tripura-a Hazacherra camp-a awm ṭhinte an ni. September 18 khan Hazacherra chhuahsanin Mizoram an pan a, uluk taka police-in an venna hnuaiah kalkawnga ni ruk vel an thang hnuah Tlabung thlenpui an ni.
Tlabungah hian Tlabunga BSF Border Outpost bulah Tlabung SDPO K Beihmotaosa hoin administrative officer T Lalmuanthanga leh official ṭhenkhatte'n an lo dawngsawng a; Lunglei aṭangin SDC Lalṭhakima Chhangte, liaison officer ni bawk leh LO dang Ngurthansanga Sailo bakah, 2nd Bn. MAP section khatin Tlabung thleng an hruai.
Bru-te hi September 24, Thawhṭanni khan Tlabung damdawi-ina medical officer Dr Lalthanpuia Sailo leh thawktu dangte'n an chen lailâwknaah an tlawh a; an hriselna dinhmun an enfiahsak bakah, damdawi mamawht zualpuite a thlawnin an pe nghal a ni.
Home department hotute thu dawn dan chuan, Bru-te hi Mizorama an rawn let dáwn lai vel chuan chhungkaw 26 an ni a; chhungkaw 17 chiahin Tlabung an thlen tâk chungchanga zawhna chhángin, Home additional secretary Lalbiakzama chuan, "Rawn let tur zat hi chhungkaw 26 tih hi report kan dawn dan a ni a, rawn let leh ta lo an awm chhan hi kan zuk hriatpui chiah tawh lo," a ti.
Bru chhungkaw 17-te hi an awm nghehna tur chu Tlabung bul Dintharah a ni a; an chenna tur in sak zawh a nih hma chu Tlabung Zodin khelmuala an awm lailâwkna bûk siamah an awm phawt ang. An in tur sak nan hian sorkar aṭangin Rs. 1,50,000 an dawng dawn a ni.
Tlabunga Bru hruai kîr tâkte chuan Tlabung Post Editor zawhna chhangin, Tripura-a Bru relief camp hrang hranga la awmte zingah Mizorama kîr duh an la awm nual thu an sawi a; Bru hruai kîr hna kalpui a nih leh hunah, anmahni aia tam daih Mizorama lêt tur an awm an rin thu an sawi bawk.
(Thlalatu - Vanlalhriatpuia Khiangte)