KHAWTHLIR

Thisen pe
Lawngtlai College NSS chuan nimin khan an college-ah blood donation camp an huaihawt a, Lawngtlai District Hospital tan thisen unit 49 an pe a, a petute mipa 30 leh hmeichhia 19 an ni. Pachhunga University College NCC leh Hrangbana College NCC-te pawhin Aizawl Civil Hospital-ah thisen unit 46 an pe a, a petute mipa 35 leh hmeichhia 11 an ni.

DA tipung
Finance department chuan tun hnai khan office memorandum a chhuah a; Mizoram sorkar hnathawk nghette'n tuna an lak mek, dearness allowance (DA) 7% chu July 1, 2018 aṭangin 9%-ah tihpun a nih thu a tarlang.

Rangva sem
Rural Housing Scheme hnuaiah nimin khan Thingdawl RD Block chhunga mi 57 hnenah rangva sem a ni a, bialtu MLA Hmingdailova Khiangte-in a hmanpui. Rangva hi mi pakhat hnenah phêk 32 ṭheuh pek a ni.

MLA-in hawng
Dampui community hall sak chu nimin khan bialtu MLA John Rotluangliana, minister-in a hawng a, khawtlang hman turin badminton racket, shuttle cock, net, volleyball leh volleyball net a pe nghal. Hall sakna hi bialtu MLA-in a MLA fund a pek hmanga sak a ni a, cheng nuai 25 sên a ni.

MRP aia toa Thil hralhte man
Siaha-a Legal Metrology department enforcement-te chuan complaint an dawn bawhzuiin nimin khan Siaha khawpuia motor part zuar pakhat chu maximum retailed price (MRP) inziak aia toa a hralh avangin an man a, Legal Metrology Package Commodities Rules hmangin an hrem. Electric bungrua zuar pakhat pawh MRP aia toa LED bulb a hralh avangin an hrem bawk.

Building hawng
Sateek High School-a science laboratory building thar chu nimin khan bialtu MLA KS Thanga, minister-in a hawng. Building hi Rs. 5,34,000 sênga sak a ni.

Jubilee lawm
Govt. Eastern High School, Biate chuan nimin khan an kum 60 (Diamond Jubilee) tlin an lawm a, bialtu MLA Vanlalawmpuii Chawngthu-in a hman pui. Govt.Eastern High School hi kum 1958 a din a ni.