Saitual leh Khawzawla din châk an tam - Lal Thanzara
Congress party (MPCC) general secretary Lal Thanzara, minister chuan, an party aṭangin Saitual leh Khawzawl biala din châk an tam thu a sawi. He thu hi nimin khan Republic Veng community hall-ah Republic Veng Local Council-a Congress sorkar thar lawmnaa a sawi a ni.
Lal Thanzara chuan, MPCC Vice President, Congress ministry-a portfolio pawimawh zawng zawng chelhtu Home Minister-in an party a chhuahsan chu pawi a tih thu a sawi a, "A chhuah dawn thâwm leh lungawi lohna a nei tih kan hriatin, a lungawi lohnate zâwtin, lungawi taka kan thawhho theihna atan hma kan la a ni," a ti.
Home minister hlui R Lalzirliana'n Saitualah a din chuan a tlin a beisei tawh lo a nih mai theih thu sawiin Lal Thanzara chuan, "Pu R Romawia bial a beisei a, ṭha taka indil loin din a tum a ni mai thei. Pu Romawia'n hotute thu thu a nih thu a sawi. Pu H Liansailova bial leh Sairang lam a en leh a, a beisei sang lo a ni ang. Champhai South a en leh a, a chhan ka hre lo, a tum ta lo a ni," a ti a; chhan hrang hrang vangin tun dinhmun an thleng ta niin a sawi.
Tun hnaiah Congress MLA Lalrinliana Sailo chu Congress party kalh záwngin nasa takin a kal tih sawiin Lal Thanzara chuan, "Kan party kan tlin tawh loh thu te, Pu Tawnluia vote 3,000 chuanga a tlin a rin thute a sawi a ni. Party a chhuahsan chuan a tan ṭha dawn lo niin a hria a, Congress tihthinrim a, inhnawhchhuahtir a tum a ni. Mahse, kan hotute'n an ui lutuk a, show cause notice an pek loh bakah, an bân lo," a ti.
MPCC General Secretary chuan, tun hnaia an party boruak chuan an party-ah harh tharna a thlen nia sawiin, "Saitual leh Khawzawla din châk an tam. Ding dawn loa inngai lungawi lote pawh an awm," a ti a; politics inlumlet mek chuan an party boruak a chawi kâng niin a sawi.
Republic Veng LC-a MNF member ṭhin pakhat chuan tun hnaiah Congress party a zawm avangin, Republic Vengah hian Congress LC a ding thar a ni.