MCON Lamp Lighting and Graduation

Mizoram College of Nursing (MCON) chuan nimin khan an multipurpose hall-ah 31st. Lamp Lighting and Graduation Ceremony an hmang a, Mizoram University vice chancellor Prof. KRS Sambasiva Rao-a'n a hmanpui. MZU Vice Chancellor chuan, Mizoramah nursing-ah M.Sc.leh Ph.D. zirna a rang thei ang bera ṭan a nih theih nan nursing college awm sate a theih ang angin MZU-in a ṭawiawm tur thu a sawi.

MZU Vice Chancellor chuan, nursing chu hna zahawm a nih thu sawiin, "Hriselna lama thawktute zingah mi pawimawh tak an ni. Indian ram bakah ram dangah nurse-te tan hna zau zawka thawh theihna a inhawng a, zirlaite'n an training laiin an zirlai bakah, online course chi hrang hrang leh ram dang ṭawngte an zir a pawimawh a ni," a ti.

MCON principal Lalchhanhimi'n MCON chanchin a sawi a; MZU hnuaia exam hnuhnung berah MCON aṭangin top 10-ah mi pakua an lang a, pakhatna leh pahnihna an nei tih a sawi.

Lamp Lighting hunah RIPANS-a nursing lam hotu Lalfamkimi kaihhruaiin first year zir tharte'n bati chhíin thutiam an chham a; zirlai ti ṭha bikte hnenah award chi hrang hrang an sem bawk.