S. Khawbung WSS hawn a ni

South Khawbung Water Supply Scheme (Pumping) chu nimin khan bialtu MLA T Sangkunga'n a hawng. He tui lakna hi Non-Lapseable Central Pool of Resources (NLCPR) aṭanga sum hmuh nuai 827.38 sênga siam a ni.

Khawbung Community Hall-a hawnna inkhawmah T Sangkunga chuan, "S. Khawbung, Zawlsei leh Khuangthing khuate hnianghnar taka tui pe thei tur hawn a ni hi a lawmawm hle a ni," a ti.

South Khawbung WSS hi khua aṭanga km. 17-a hla Khawchhak Tuipui kama awm a ni a, tui lakna hnâr ber chu Tuipui a ni. WSS siam hna chu kum 2012-ah thawh ṭan a ni a, kum 2013-ah commission niin, kum 2018-ah hawn theiha peih a ni. S. Khawbung, Zawlsei leh Khuangthing khuate a châwm thei dawn a, ni tin tui litre 38,000 pump chhuak thei tura beisei a ni.