Zirna lamah hma kan sawn nasa - CM Hawla

Serchhip DIET building thar, cheng nuai 233.53 senga sak chu nimin khan chief minister Lal Thanhawla'n a hawng a; thu sawiin CM chuan, Mizoramin zirna lamah hma a sawn nasat thu a sawi.

Chief Minister chuan, kum 10 chhungin zirna lamah Mizoramin hma a sawn nasa nia sawiin, "DIET building hrang hrang pawh district tinah tun hnaiah hawn a, Serchhip DIET hi building hawn hnuhnun ber a ni. Zirna tihmasawn turin kawng hrang hrangah a ṭul angin sorkarin hma a la zel a, theihtawp a chhuah ṭhin a ni," a ti.

Lal Thanhawla chuan, zirtirtute chu an zirlaite tan 'role model' ṭha ni tura chahin, "In hawiher, incheina leh ṭawngka chhuakahte fimkhur a ṭul," a ti a; zirlaite thiamna leh an hmabak innghahna chu zirlaite an nih avang­in, an mawhphurhna hre reng chunga an hnaah ṭhahnemngai taka thawk turin a chah.

School Education minister H Rohluna pawhin thu sawiin, zirlaite'n zirtirtu ṭha an neih theih nan zirtirtu lâk leh hna thawh kalphung­ah inkaihhruaina eng emaw chen siamṭhat a nih thu a sawi a, "Hmun kilkhâwr zawka uaptu headmaster nei lo an awm thluah chu pension dawn hnaia headmaster tura indah ṭhin a nih avangin, kum la naupang zawkte pawhin headmaster an kai thuai theih nan hmalak a ni," a ti.

Serchhip DIET building hi CSS aṭanga sum hmuh hmangin June 12, 2015-ah sak ṭan a ni a, November 10, 2016-ah sak zawh a ni. Chhawng thum a ni a, chhawng tin zau zawng belhkhawm chu metre 758 bial a ni.