Mizoram Electoral Roll thar berah Tripura camp-a Bru-te an tel dawn

Mizoram electoral roll thar ber tur chu vawiin hian district khawpui hrang hrangah tlangzarh a ni dawn a, roll thar ber turah hian Tripura refugee camp-a Bru-te pawh telh an ni dawn.

Election Commission of India (ECI) thupek angin, Mizorama district tina district election officer (DEO)-te'n an district-a electoral roll ennawnna tura draft electoral roll an tlangzarh tawh a; draft electoral roll-ah hian voter 7,57,854 awmin, mipa aiin hmeichhia 16,765-in an tam zawk.

Complaint awmte leh siamṭhat ngaite siamṭhat a nih hnuah vawiin hian electoral roll thar, kumina Assembly inthlanpuia hman tur chu tlangzarh a ni ang.

Vanglaini palai zawhna chhangin Mizoram chief electoral officer (CEO) SB Shashank chuan, vawiina tlangzarh tur Mizoram electoral roll thar berah Tripura refugee camp-a Bru-te telh an nih dawn thu a sawi.

Mizoram all NGO leh all political party-te'n Tripura relief camp-a electoral roll ennawnna (revision) neih an rem ti lo a, NGO hruaitute chuan electoral roll ennawn hna thawktu tur Mizoram sorkar official-te pawh an dang a ni. Mahse, refugee camp-ah roll ennawn hna thawh a ni tho a, ennawnna atana hman form hrang hrangte chu Mamit DC Complex-a Election Branch office-ah dah a ni.

Mamit DC complex-a Election Branch Office chu August 23, 2018 zanah rawk a ni a, Tripua relief camp-a Electoral Roll Summary Revision tih tawhna lehkha pawimawh hrang hrangte lak chhuah a ni. He thil thleng chungchangah hian August 24 zan dar 8-ah Mamit Police Station-ah FIR thehluh a ni a, thubuai ziahluh a ni.

Mamit SP HL Thangzuala hoa Mamita police officer-te ṭhukhawm chuan, Election office rawk chungchang chhui zui turin Special Investigation Team an din a; SIT hi Mamit SDPO-in kaihruaiin, ani bakah hian member pali an awm.

Mizoram CEO chuan, Bru relief camp-a Electoral Roll Summary Revision tih tawhna lehkha pawimawhte bo mah se, electoral roll thar berah relief camp-a Bru-te an tel dawn thu a sawi a, "Keini chu Election Commission of India thu thua awm tur kan ni a, ECI lamin telh tura min tih tlat avangin kawng kan zawng a ni," a ti.

SB Shashank chuan, Mizoram inthlan tur atan an inpeih tawh nia sawiin, "ECI official-te pawh ṭum eng emaw zat an lo kal tawh a, an hotu lawkte rawn kal hun tur erawh kan la hre lo. Ṭha taka inthlan buatsaih a nih theihna atan darkar 24 chhung hna kan thawk a ni," a ti a; inthlan hun turah ECI aṭangin hriattirna an la dawn loh thu a sawi.

Tuna Mizoram Member of Legislative Assembly (MLA)-te term chu December 16, 2013-a inṭan a ni a, December 15, 2018-ah a tawp dawn a ni.