CM-in SHG-te hman tur motor a vai liam

Mizoram State Rural Livelihoods Mission (MSRLM) hnuaia scheme pakhat, Aajeevika Grameen Express Yojana (AGEY) hmalaknaa self help group (SHG) thawk ṭha thlan chhuahte hman tur motor 30 chu nimin khan chief minister Lal Thanhawla'n Tlangnuam BDO pisa kawt aṭangin a vai liam.

Chief Minister chuan, SHG-te chu khawtlang leh chhungkaw tan an ṭangkai a, a bik takin hmeichhiate tan an intundinna kawng ṭha tak a nih thu a sawi a, "SHG-te hian mimal leh khawtlang tan mai bakah, ram leh hnam tana thawktu an ni tih in hriat reng a pawimawh," a ti a; motor dawngtute chu ṭangkai taka hmang ngei turin a chah.

Kut hnathawktute, mi harsa leh chhumchhiate chawikan chu ram hma­sawnna atana a pawi­mawh thu sawiin Lal Than­hawla chuan, "Chumi tihlawhtling turin NLUP kaltlangin sorkarin hma a la a; NLUP hi a dawngtute zinga hmang ṭha lo tlemtê tih lohah chuan a hlawhtling viau a, state dangte tan pawh entawntlak a ni," a ti.

AGEY hnuaia motor leh hi Tata Sumo a ni a; kum 2017-18 khan RD block pathum - Tipa (Tuipang), Serchhip leh Bilkhawthlirah motor 18 pek a lo ni tawh bawk.