Aizawlah zaipawl leh rimawi kûtpui ṭan

Art & Culture depart­ment leh Sangeet Natak Akademy, New Delhi-te chuan nimin khan Vanapa Hall-ah Swar Sudha - Festival of Choral Music & Instrumental Ensemble an buatsaih a, Art & Culture minister R Romawia’n a hawng.

R Romawia chuan, India ram chhunga hnam hrang hrangin rimawi, lâm leh lemchan an neihte vawnhim leh tihhmasawn kawngah Sangeey Natak Akademi hmalakna a fak a, "Mizoram leilunga hetiang programme pawimawh nghah a ni hi a lawmawm. India rama chengte inpumkhata kan awm theihna atan kan hnam ṭheuh rimawi, lâm leh lemchante kan inhmuhpuia kan inhriatpui a ṭul a ni," a ti.

Festival hi vawiin leh naktukah chhunzawm a ni dawn a; Mizoram aṭang­in zaipawl pathum - Cen­tral YMA Zaipawl, Bel Canto Choir leh The Lep­rosy Mission Choir-te an tel. New Delhi, Shillong, Guwahati, Kohima, Imphal, Sikkim, Arunachal Pradesh leh Tripura aṭangin zaipawl leh instrumental music tum turte an tel bawk a ni.