Kawng chhiah siam phûtin kawngpui dang

MNF party-a Kolasib District Joint Block Committee (KDJBC) chuan Mizoram kawngpui chhe lutuk siamṭha tura sorkar an phûtna lantir nan nimin khan zing dar 5 aṭanga tlai dar 5 thleng an district chhunga kawngpui (NH-306) an dang.

KDJBC member-te chu lirthei tlân vel dang turin Bualpui, Kawn­puia Sairang péng, Khuangpuilàm, Rengtekawn, Vairengte IOC bul, Vairengte auto-rickshaw stand (ramri bul) leh Bilkhawthlir Champhai péngahte an duty a ni. Kawng dan vang hian buaina chhuak leh harsatna lian tham thleng a awm lo a, kawng an danna huam chhunga sikul leh pisa hrang hrangte chu hawn vek a ni.

Kawngpui dangtute hian lirthei eng emaw zat an dang a, mahse, chu'ng lirthei tángte chu kawngpui dan tihtawp a nih hnuah an tum ram lam panin an tlan leh thei nghal a ni.

KDJBC-te resolution
1) Inkalpawhna kawngpui chhe lutuk siamṭhat phûta road block kan neih chungchangah Zoram mipuite'n road block kan neih chhan hria a, min phûrpuia min thláwp tlat hi lawmawm kan ti a, thil ṭha tihna kawnga ṭang tlang ṭhin turin kan insáwm a ni.
2) Sunshine Overseas site office, North Chhimluangah kal chilhin, heti tak maia an kawng an enkawl ṭhat theih loh chungchang zawhfiah a ni a, agreement an siam tawh anga hun tiam chhung, March 15, 2019 ral hmaa blacktoping zo tur leh October 15, 2018 ral hmaa kawng khuar hnawh (pot hole) zawh an intiam angin, chhuanlam engmah siam loa zo ngei turin kan hriattir a, an hnathawhte kan en zui zel dawn.
3) Sunshine Overseas-te hnathawh execute-tu tur Mizoram PWD-te an nih laia PWD-te'n instruction an pekin awmzia a nei lo ṭhin nia lang hi a mak kan ti. Mizoram puma inkal­pawhna kawngpuite heti tak maia a chhia leh a siamtu company-te'n heti tak maia ram mipui zah lo leh min ngai pawimawh lo ta mai hi sorkar hotute leh company hotute hian hnungthak in hiah tawnna an nei ngeiah kan ngai tlat a ni.