Thisena ram hmangaihtute nen He bial hi kan siam dawn - Zira

MPCC vice president hlui R Lalzirliana chuan, Congress party aṭanga hnawhchhuah a nih avangin a zâm loh thu sawiin, "Thisena ram hmangaihtute nen he bial hi kan siam dawn," a ti.

September 25, Thawh­lehnia a bial, Maite khua a tlawhnaah thu sawiin R Lalzirliana chuan, "Congress party chiah ram hmangaihtu an awm lo. Ram hmangaihtu, thisena ram hmangaih vanga nunna hial chán tam tak an awm. Chu'ngte nen chuan he bial (Ṭawi bial) hi siam kan tum a ni," a ti a, Saitual district a pian theihna tur chuan ṭan tlan a ṭul thu a sawi.

R Lalzirliana chuan, Saitual district a duh vanga minister aṭanga bânna Chief Minister hnena a thehluhah 'Party-ah chuan lungrual takin kan thawkho zel dawn nia' tiin tâwpna a siam thu a sawi a, "Chhungkaw lalna siam duh vang nge ka hre lo, hnawk min tia min hnawtchhuak ta a ni. Party aṭanga hnawh­chhuah a nih avangin ka zam lo a, pawi pawh ka ti lo," a ti.