KHAWTHLIR

Thisen pe
KM Higher Secondary School NSS chuan nimin khan an sikulah blood donation camp an huaihawt a, zirlai mipa 46 leh hmeichhia 22-te'n Aizawl Civil Hospital tan thisen unit 68 an pe. Vaivakawn unit ṬKP pawhin nimin khan Aizawl Civil Hospital-ah thisen unit 16 an pe a, a petute mipa 13 leh hmeichhia pathum an ni.

Kawng zauh dan tur enfiah
PHE department leh UDPA department hotute, engineer-te leh Tuikual South khawtlang hruaitute chuan nimin khan Tennis Court aṭanga Kaisara Road luhna kawng pêng lak ngil leh zauh dan tur an enfiah; Congress ṭhalai president Dr Lalmalsawma pawhin a ṭawiawm a ni.

MZU tlawh
Defense Research Development Organization (DRDO) hotute chuan September 25-26 chhung khan director general Sudhir Gupta hoin Mizoram University (MZU) an tlawh a, defense incubator din dan tur an enfiah. An thil din tum chungchangah hian MZU hotute an kâwm nghal a ni.

KVK meeting
Krishi Vigyan Kendra (KVK), Mizorama district pariata KVK-te chuan nimin khan KVK, Lengpui, Mamit district-ah Half Yearly Review Meeting an nei. Meeting hi ATARI, Zone-VII director Dr Bidyut C Deka leh Agriculture (RE) director Dr H Saithantluanga ten an hmanpui a; KVK hmalakna hrang hrang an thlirho bakah, KVK, Lengpuia RKVY hnuaia KIOSK leh Poultry Unit hawnna hun an hmang a ni.

Bru hruai kîr belh
Nimin khan Tripura relief camp aṭangin Bru chhungkaw 11 chu Mizoram pana hruai chhuah an ni. Bru chhungkaw 11-te hi mi 67 niin, Khakchangpar camp-a awm an ni a; Mamit district khaw pathuma dah tur an ni. Chhungkaw tin hnenah hian bul ṭanna atan Rs. 5,000 ṭheuh pek a ni.