Sorkar chu langtlang a nih a ngai - Chief Minister

New Secretariat Complex-a State Tax Zonal Office building thar chu nimin khan chief minister Lal Thanhawla'n a hawng. CM Hawla chuan, sorkar chu langtlang a nih a ngai tih a sawi.

Chief Minister chuan, sorkar chu lang­tlang leh mipuite tana dawr nuam a nih a ngai tih sawiin, "A thawktute pawh mi rintlak leh belhchian dâwl an nih a ngai. Chumi atan chuan post sang ber aṭanga a hniam ber thlengin thawktute an pawimawh a ni," a ti.

Tun hnai kum 10 chhungin nasa takin sorkar department-te tichangtlung tura hmasawnna ruhrel hmuh tur a awm tih sawiin Lal Thanhawla chuan, "Heng hmalaknate tihlawhtling tura tha thawhtute chungah lawmthu ka sawi a ni," a ti a; sorkar hnathawkte chu ṭhahnemngai taka thawk zel turin a chah.

Chief Minister chuan, state hmasawnna tura hmalakna kalpui mek NLUP vanga beneficiary-te thawh ṭhat vang leh sorkar lama thawktute thawhrimna vangin economy-ah Mizoramin hma sawn chho zel niin a sawi a, "India rama state GSDP ṭhang chak ber pali zingah Mizoram a tel. Hmasawn zel turin ṭangrual taka kan thawhho a pawimawh a ni," a ti.

Khualzahawm Lalsawta, Taxation minister chuan, mi in luah aṭanga bul ṭan Taxation department-in building changtlung tak an nei ta chu a lawmpui thu sawiin, "Ramin hma a sawn chuan chhiah a pung a, chhiah a pun chuan sorkarin mipui tan ṭha zawkin hna a thawk thei a ni," a ti a; department-a thawktute taima leh rinawm taka thawk zel turin a fuih.

State Tax Zonal Office building hi September 2017-a sak ṭan niin, August 30, 2018-ah sak zawh a ni a, a sak nan cheng nuai 443.14 sên a ni. A vaiin chhawng nga a ni a; ground floor leh first floor chu Taxation department Zone-I leh Zone-II awmna tura ruahman niin, second floor-ah auditorium leh mi 50 lenna conference hall a awm ang a, basement-I chu canteen leh parking area atan duan a ni a, basement-II ah chowkidar quarter pahnih a awm ang.