PWD Minister hi báng ngam se - MLA Lalruatkima

MLA Lalruatkima, MNF general secretary chuan, PWD minister Lal Thanzara'n a department enkawlah tih ngaihna a hre lo tih a pawm nia sawiin, tihngaihna a hre lo a nih chuan báng mai se Mizoram tan a ṭha dawn niin a sawi.

Kanan Venga Chawnpui veng panna kawng lai thar 'RK Road' a hawnnaah Lalruatkima chuan, "PWD minister Pu Lal Thanzara'n 'A ngaihna hre lo' tia MNYF-in an puhna a pawm thu chanchin tharah ka hmu a. A ngaihna a hre lo a nih chuan báng ngam se Zoram tan a ṭha khawp ang. Heti khawpa kawng chhiate hi a ziaawm ang a, an kawng siam chhun tlo lo em emte hi a tlo phah deuh ngei ang," a ti.

Lalruatkima chuan, kum 2017-18 chhungin kawngpui thawm ṭhatna tur sorkarin cheng nuai 9,606.49 a nei tih sawiin, "Kawngpui chhiat dan enin, sum hi hman zawh vek a, dil belh hial âwm a nih laiin, cheng nuai 1570.47 lai hmang zo thei loa an awm hi a mak a ni," a ti a; tuna PWD Minister chuan engtikah mah Mizote kawng ṭha a pek theih a rinawm lo niin a sawi.

RK Road hi metre 337-a thui a ni a, MLA fund leh AMC aṭanga sum hmuh hmanga laih a ni.