Teachers Training Complex lungphùm phúm a ni

Mizoram Youth Commission (MYC) chairman Joseph Lalhimpuia, MLA chuan nimin khan Lunglei DEO Complex-a Teachers Training Complex sak tur lungphûm a phúm. He project hi cheng nuai 1040 sênna tur a ni a, School Education department hnuaia project lian ber a la nih thu sorkar thuchhuah chuan a tarlang.

Lung phûmna inkhawm Lunglei Convention Centre-a neih­ah Joseph Lalhimpuia chuan, Lungleia Education Complex din a nih theih nan kum 2006 velah an buaipui ṭan thu sawiin, project an siamin Joint Director paltlang zo lo

ṭhin mah se, theihtawp chhuaha an bawhzui ṭhin avangin a hlawhtlinna hmuh a ni dawn ta tih a sawi a, "Hun rei lo te chhungin chhim lamin zirna piah lamah kawng tinrengin malsawmna dawngin hma a sawn chak hle... Lungleiah Mizoram Oxford din thar leh ni se ka duh a ni," a ti.

School Education deputy director Lalchung­nunga tarlan danin, Lung­lei DEO Complex-ah hian building block pa­hnih - Teachers Training Complex leh Teachers' Accomodation tur sak a ni dawn a; Teachers Training Complex chu chhawng sarih tur niin, Teacher's Accomodation chu chhawng li a ni ang. LB Associates-in an sa dawn a, kum hnih chhung­a sak zawh tur a ni.