Thisen pek leh a kaihhnawih

Medical science lamah thiamna a sang hle tawh a, thisen pek dan kalphung pawh tihchangtlun zel. Mi thiam an pung a, hmanraw ṭha a chhuak zel bawk. Hetih lai hian, damlote thisen mamawh phuhru turin ran thisen emaw, thisen siam chawp emaw, vitamin ṭha leh food supplement ṭha tak takte pawh a la hman tlak loh a; mihring thisen vêka do lêt a la ngai reng. Chuvangin, thisen pek leh a kaihhnawihah hriat tur pawimawh tak tak a awm a ni.

A. Thisen pek dan chi hrang: Tun hma chuan thisen pek dan hi kawng thum a awm. Kum 1996 aṭang khan thisen lei leh hralh (commercial donation) chu Supreme Court-in a khap a; thisen lei leh hralh chu danin a phal loh avangin thisen pek dan hi kawng hniha ṭhen a ni ta a - hman pûk rulhna (replacement donation) leh a thlàwna pek (voluntary donation)-te a ni.

Hman pûk rulhna: Damlote mamawh huna hman mai theih tur thisen thianghlim awm reng tura beisei a nih laiin, a thlàwna petu an tam tâwk loh avangin blood bank aṭanga pûk chu rulh a ngai ṭhin a, ‘replacement donation’ an ti. Hmanhmawh taka thisen petu zawn chûk chûk a ngaih loh nan hman pûk rulh leh hi a pawimawh em em. Blood bank-ah thisen a awm loh chuan damlo chhungte leh ṭhiante emaw aṭangin petu zawn a ngai ṭhin. Chutianga pek pawh chu replacement donation-ah chhiar a ni.

A thlàwna pek: Mi tlawmngaite’n tu emaw tan bik ti loa a mamawhtu apiang hman theih tura a thlàwna an pek hi voluntary donation a ni a; pawl, ṭhianho leh mimala tih theih a ni. Tunah hian ram 195 zingah ram 62 chu thisen pek zawng zawng zaa za a thlawna pe (100% voluntary donation) thei an ni. Ram 62 zingah India a tel ve thei rih lo.  

B. Thisen pe thei leh enfiahna: Mi hrisel ṭha pangngai, kum 18-65 inkarte’n thisen an pe thei. Taksa rih záwnga kg. 45 tling, natna benvawn nei lo, hrisel ṭha pangngai chuan an pe thei vek. Thisen hi thla thum danah a pek theih a, kum khat chhungin vawi 4 pek theih a ni. Thisen pekna hmunah doctor-te’n hriselna dinhmun an endik a, pe thei leh thei lo chu an thliar ṭhin a; endikna hmunah hian zawhnate dik taka chhàn tur a ni. Dâwt sawi vangin mahni tan leh mi dang tana thil pawi tak thleng thei a nih avangin thu dik chauh sawi tur. Thisen pe thei loa kan inngai a nih chuan pêk tum luih tlat loh a ṭha. Thisen pek chungchanga thil pawimawh ber chu thisen petu tan leh dawngtu tan a him ve ve tur a ni.

C. A thlàwna thisen pek a ṭul: A thlàwna thisen pek a ṭul chhan leh pawimawhna sawi tur tam tak a awm a, a pawimawh zual chauh kan sawi ang. 

Thisen thianghlim mamawhna: Thisen pek hi a thianghlim ngei tur a ni. Damloin thisen a dawn hmain endik hmasak vek tur a ni a, natna hrik awm leh awm loh enfiah vek a ngai. Damloin a dawn theih tura thisen sâwngbàwl chhung hi a rei lo berah darkar 3 tal a ngai. Chuvangin, damlote’n an mamawh hun taka an dawn theih tura lo pêk lâwk leh blood bank-ah hman mai tur a awm reng a ṭul hle. A thlawna petu (voluntary donor)-te thisen a thianghlim bik a, paih tur a awm meuh lo an ti. Voluntary donor-te’n hriselna an ngai pawimawh a, thisen pe reng thei tura an invawn thianghlim vang a ni. 

Rîkrum thilah: Lirtheia chetsualna vang te, nau neih vanga thi pûtte leh khuarel chhiat tawhna vangtein hmanhmawh taka thisen pek a ngai fo a; dam khawchhuah nan mi pakhatin thisen tam tak a mamawh thei. Blood bank-ah thisen dah khawl sa a awm loh a, mamawh huna thisen dawn loh avangin nunnain a tuar thei a ni. Chuvangin, thisen thianghlim hman mai theih tur blood bank-a thisen a awm reng hi rîkrum thil atan a ṭul tak zet. 

Petu nei lo an awm: Damlo ṭhenkhat chu hmun hla tak aṭanga kal an ni a, thisen petu tur chhungte leh ṭhenrual nei lo an awm fo. Chu’ng mite tan chuan mi tlawmngaite’n a thlàwna thisen an pek hi an hmang ṭangkai em em ṭhin. Thisen petu nei lote tan a thlàwna miin an lo pek lâwk a ṭul hle a ni.

Mamawh a pung zel: Thiamna a sang zel a, natna hmuh chhuah thar a pung zel bawk. Damdawi-inte’n hmanrua leh bungrua an nei changkang zel a, Aizawlah Cancer Hospital a awm ve ta hial a. Heng avang hian thisen pek ngai damlo an tam tial tial. Thisen lak leh pek chhuah zat kum tin a pung a; chuvangin, thisen pek hi bànsan a rem lo a, uar sauh sauh a ṭul zel zawk.

D. Thisen sâwngbàwl: Mihring puilting, hrisel pangngaiin thisen hi litre 4-6 (mililitre 4,000-6,000) vel an nei a, rih zawng azirin a danglam thei. Blood bag hi Mizoramah chuan mililitre (ml.) 350 an hmang ber a, chu chu unit khat tia sawi a ni. Ml. 350 chu thisen kan nei zat aṭangin 5.83% - 8.75% a ni. Thisen ṭhen darhna khawl awm hma chuan a bag (whole blood)-in pek chhâwn (transfuse) a ni ṭhin a; tunah erawh chuan damloin a mamawh bâk a dawn loh nan leh a mamawh chauh a dawn theih nan kháwl hmangin ṭhen a ni.

Thisen endik dan: Thisen a thianghlim leh thianghlim loh endik a pawimawh hmasa ber a. Damlo hnena pek hmain endik ngei ngei tur (mandatory test) a awm a, chungte chu - Hepatitis-B, Hepatitis-C, HIV/AIDS, Syphylis leh sikserh te a ni. Heng natna hrik zinga pakhat pawh hi thisena a awm chuan thisen chu hman tlak a ni lo a, an paih ṭhin. 

Thisen thiar dan: Thisen hi cell chi hrang hrang a ni a, a khaikhawmtu tui rîl (liquid) a awm a, chu chu ‘plasma’ tih a ni. Thisenah hian red blood cells, white blood cells, platelets leh plasma-te a awm a; plasma hi 90% chu tui a ni. Thisen chi hrang hrangte dam hun chhung chu hetiang hi a ni a. 

Packed Red Blood Cell    - Ni 35

Fresh Frogen Plasma    - Ni 365

Platelet Concentrate    - Ni 5

Platelet Rich Plasma    - Ni 5 

Thisen sawngbawlna man: Tun hma chuan thisen sâwngbàwlna man (processing charge) hi thisen hman man (user charge) tih a ni a; National Blood Transfusion Council (NBTC) thuchhuak angin, thisen dawngtuin thisen sawngbawlna man eng emaw chen a pe ve tur a ni, tih a ni. India ram state tam zawkah chuan thisen dawngtute’n thisen sawngbawlna man an pe ṭhin. NBTC chhût danin, thisen hi damloin a dawn theih tura siam turin unit khatah Rs. 1,450 vel sèn a ngai. Kum 2015 tir aṭang khan Mizoram sorkarin sorkar blood bank aṭanga thisen dawngtute aṭangin unit khatah Rs 550 a la a; BPL chhungkua, rîkrum thil leh nau neih vanga thisen pek ngaite erawh a huam lo. Sum hmuhte chu blood bank mamawh leh thisen petute ei leh in leh mamawh hrang hrang atan hman a ni ṭhin.

Kum 2019 tìr aṭangin sorkar damdawi-ina damlote chu pawisa chawitir loin thisen hmantir a ni leh ta zawk a. Private hospital-a damlote erawh chu unit khatah Rs. 550 chawitir an ni a, hei hi sawngbawlna senso 

aṭanga chhûtin 36% vel a ni. Thisen unit khatah Synod Hospital-in Rs. 800 leh Christian Hospital, Serkawnin Rs. 950 an la mek niin a hriat. 

E. Thisen pek dinhmun: Drugs & Cosmetics Acts, 1940 angin, thisen hi damdawi a ni a, phalna neih loh chuan thisen inpek (blood transfusion) hi tih theih a ni lo. Blood bank nei turin national leh state level-ah thuneitute (licensing authority) phalna neih a ngai a, a khirhkhàn viau. Phalna pêk hnuah pawh a khát tâwkin phalna pek zel tlak an nih leh nih loh endik ṭhin a ni. Mizoramah sorkar blood bank pakua leh charitable blood bank pahnih Durtlang leh Serkawnah a awm mek. Kum 2019-20 chhunga blood bank 11-a thisen pek zat chu hetiang hi a ni. 

F. Private hospital-a thisen pek chhuah: Mizoramah blood bank nei lo private leh kohhran enkawl damdawi-in a awm nual a, chu’nga damlo awmte thisen mamawh chu blood bank aṭangin pek chhuah a ni. Aizawl Civil Hospital leh Synod Hospital hian thisen ṭhenna khâwl (component separator) an neih avangin blood bag (whole blood)-a pek chhuah bakah thisen thliar hran sa an pek chhuah a tam hle. Thliar hran hnuah pawh unit khat ang zeal chhût a nih avangin pek chhuah unit hi a lang tam a ni. Miin thisen unit khat (ml. 350) a pek hi unit 4-ah a chhuak thei tihna a nih chu. Kum 2019-20 chhungin blood bank aṭangin private hospital-ah thisen unit 13,770 pek chhuah a ni a, blood bank palite’n an pek chhuah dan chu:

Civil Hospital, Aizawl    - unit 11,673

Synod Hospital, Durtlang    - unit 1,194

Civil Hospital, Lunglei    - unit 230

District Hospital, Lawngtlai    - unit 673

Total    - unit 13,770

G. Thisen pêk rûnpui: Thisen hmuhna bulpui ber chu thisen pêk rûnpui (blood donation camp) a ni a, chu’ng aṭanga thisen hmuh chu kum 2019-20 chhungin 67% a tling. Mamawh phuhru tur hian thisen pêk rûnpui huaihawt hi a ṭangkai hle. Thisen pêk rûnpui huaihawt tur hian ruahman lâwk a ngai ṭhin a, a tlangpui chauh sawi zui ila.

Inzirtirna (awareness campaign): Thisen pe tur hian mi rilru hmin hmasak a ngai a, chu chu a ṭangkai hle. Thisen pe turin innawr luih tur a ni lo a, mahni duh thu ngeia pek tur a ni.  Rilru hmin hmasa loa pektir chuan a hnuah harsatna a thlen palhin a pawi thei. Thisen pek pawimawhna zirtirin a thlàwna pek ṭul chhante hrilh hmasak a pawimawh em em a; mi thinlung hmin thlap hnua pektir hi a tlo ber fo.

Pek hun ruat chungchang: Thisen pêk rûnpui huaihawt dawn hian blood bank nen inràwn hmasak tur a ni. Blood bank-ah a hmunnghâk awm ve reng a ngai a, páwn lama donation camp nei turin inbuatsaih lâwkte an mamawh ṭhin. Thawktu indaih tâwk loh vangin ṭum khatah hmun hnih/thuma inṭhen darh tham an awm lo a, camp neih hun torah a hma lama ruat lâwk a ngai ṭhin.

Hmunhma buatsaih: A hun leh hmun ruat hnuah thisen pekna hmun tur leh khum siam dan te, thisen petu beisei zat chungchangte hi blood bank lam tan a tlangpuia lo hriat lâwk theih a ṭha hle. Donation camp hi a hlimawm thei ang bera buatsaihin, mi rilru tiphûr záwnga huaihawt a nih phei chuan a hnu zel atan thil ṭangkai tak a ni. 

H. Mimala thisen pek: Mahni emaw, ṭhiante nen emaw blood bank-a kala thisen pek ṭhin a pawimawh hle. Tunah chuan mimala pek nacháng hria an pung ve zel a, a lawmawm tak zet. Mi ṭhenkhat chuan ni pawimawh bik - inneih leh pian champha hriat reng lawm nante an pe ṭhin. Ṭhahnemngai zual deuh chuan thla thum danah an pe zat zat ṭhin bawk. India ramah hian vawi 100 pe tawh mi tam tak an awm a, vawi 150 chuang pe tawh pawh an awm nual a ni. A huhoa tlawmngaihna kan ngaihhlut ang bawk hian mimala chêt chhuah i uar zel ang u. Mimala thisen pek ṭul chhante:

Mimalin blood bank-a thisen a pek chuan hun a hek lo a, a hranpa taka sum sèn a ngai lo a, a hautak lo bik. Donation camp-ah chuan tih ngai leh sum senna tur a awm nual ṭhin. 

Thisen pek kawnga kan tlawmngaihna hi a ṭha zawnga tihchangkan zel a pawimawh hle. Hnathawhna, khawsak dan leh dinhmunin a zir loh avangin a huhoa thisen pêk rûnpui buatsaihnaa kal thei lo an awm ṭhin a. Chuvangin, donation camp hlamchhiah chuang loin, mimala thisen pek hi Mizo tlawmngaihna tihchangkan dan ṭha tak a ni. Ram changkangah chuan thisen petu tam zawk chuan hunbi ṭha taka neiin blood bank-ah an pe mai ṭhin. 

Thisen pêk rûnpui huaihawt hi a hautak deuh a, páwl pakhat tan kum khatah vawi khat bâk huaihawt a harsa ṭhin. Pawlin donation camp a buatsaihah chauh thisen kan pek chuan kum khatah vawi hnih/khat bak kan pe thei dawn lo a, kan dam ṭhat laiin thisen kan pe tam hman dawn lo. Chuvangin, thisen vawi tam tak pe turin mimala pek fo a ngai; vawi 50 pe chin (centurion donor)-te hi chu mahnia pe ṭhin an ni tlangpui. 

Mahnia blood bank-a thisen pe ṭhin an pung zel a; chu chuan a thlawna thisen pek dinhmun a tiṭha hle. Nikum khan mimala thisen pek zat - unit 7,942 chu thisen pek zawng zawng aṭangin 26% a ni a; kum 2017-18 chhungin unit 4,500 (17%) leh kum 2018-19 chhungin unit 4,781 a ni. 

I. Thisen pek a hlauhawm lo: Thisen pek hi a hlauhawm lo a, mi hrisel ṭha pangngai tan taksaah harsatna leh chhiatna a thlen lo. Thisen hi mihring puitling pangngai rih zawng kg. khat zelah mipain ml. 76 leh hmeichhiain ml. 66 an nei tlangpui a; chutih laiin, mi thiamte chuan mihringin thisen a mamawh zat chu kg. khat zelah ml. 50 a nit hung. Mi hrisel ṭha pangngai hian thisen chuang liam mipain ml. 26 leh hmeichhiain ml. 66 an nei tihna a ni. Thla thum dana thisen unit khat (ml. 350) kan pek chhuah hian taksa tan a pawi pha lo. Taksaah hian thisen cell hi ni 120 chhung a dam thei a, ni 120 hnuah cell thar a inseam leh zel ṭhin an ti a. Thisen kan pek loh pawhin thisen cell chu amahin a keh chhe tho ṭhin.  Chuvangin, thisen keh chhe leh tho tur pek chhuah hi hrisel ṭha tan a hlauhawm loh a ni. 

J. Tlángkawmna: Mizorama thisen pek zawng zawng hi a thláwn pek ni vek ta se, damlote leh an chhungte tan a hahdamthlak hla ang. Sorkarin sum ngah viau mah se, thisen a lei thei lo, danin a phal lo tlat. Sorkarin blood bank te, thawktute leh a hmanruate a ngaihtuahin a pe thei a, thisen erawh chu mipui tum tur a ni ve thung. Chuvangin, thisen kan pek hian sorkar kan ṭanpui a ni mai lo a, kan ṭhenawm khawvéngte kan ṭanpui zawk a ni.