NLUP khinna High Court-in a hnâwl ; NLUP sem chhunzawm a ni

Gauhati High Court-a Vanramchhuangi'n NLUP a khinna chu High Court chuan nimin khan a hnâwl. NLUP Implementing Board (NIB) chuan nimin khan NLUP sem chhunzawm tura hriattirna lehkha a tichhuak nghal.

NLUP khinnaa High Court thutlukna chungchangah hian NIB hotute chuan nimin khan NIB conference hall-ah thuthar thehdarhtute an kâwm a; NIB vice chairman PL Thanga chuan, NLUP chungchangah hian September 26, Nilaini khan Gauhati High Court, Aizawl Bench-ah hearing neih a nih thu sawiin, "High Court chuan vawiin (September 27) hian thutlukna a siam a, petition a hnawl a, NLUP kan sem chhunzawm leh thei ta a ni. Guidelines-te zâwm turin min hrilh nghal bawk," a ti.

PL Thanga chuan, NLUP dawng tur thlan dan te, village level selection report te, inkahihhruaina hrang hrang, Mizoram puma mite chu High Court-ah an thehlut tih sawiin, "Document pawimawhte High Court-ah kan thehlut vek a, trip thum kan pe a ni," a ti a; NLUP chungchanga village level-a hmalaknate chu a ṭhat tâwk thu leh a dawng awm tak takte'n ṭanpuina an dawn thu a sawi.

High Court-in NLUP sem rih lo tura a tihna thupek a ṭhiah hma leh niminah PIL hnâwla thutlukna a siam hmain NLUP sem chhunzawm a nih leh nih loh zawhna chhangin PL Thanga chuan sem chhunzawm a nih thu a sawi a; Court thutlukna thar awm hmaa Court thutlukna ang ni loa NLUP sem chhunzawm chu contempt of court a nih leh nih loh zawhna chhangin, "Contempt of court a ni miah lo; NLUP hi Court-in a stay loh avangin," a ti.

NIB Vice Chairman chuan, Court order lo awm tawhte chu an mithiamte'n an en a, an thu anga kal an nih thu sawiin, "Kei ni chuan Court kan hnial reng reng lo a, kan hrilhfiah lo," a ti a; "He thilah hian keimahniah chuan kan tih tur kan ti a ni," a ti bawk.

NLUP hmanga auto-rickshaw sem chungchang thubuai awm mek chungchanga zawhna chhangin PL Thanga chuan, "High Court-ah hearing turin an ti mek a, an tihfel thuai kan beisei," a ti.

NLUP dawng tur thlan dan avangin Vanramchhuangi, Chaltlang chuan Gauhati High Court, Aizawl Bench-ah public interest litigation (PIL) a thehlut a; chuvang chuan High Court chuan August 3, 2018 khan interim order tichhuakin, Mizoram sorkar chu chawlhkar li chhung NLUP sem chawlhsan rih tur leh chumi chhung chuan High Court-ah sawifiahna thehlut turin a hriattir a ni.

High Court order a awm hnuah Mizoram sorkar chuan NLUP chungchangah hian August 10-ah notification a chhuah a, August 27-ah government gazette a chhuah bawk a; hengte avang hian PIL thehluttute lam chuan Court thutlukna awm hmain sorkarin NLUP sem a tum nia an hriat avangin ukil C Lalramzauva chuan September 11 khan Gauhati High Court-ah NLUP stay dilna (application) a thehlut a ni.

NLUP stay application thehluh ni, September 11 vek hian Gauhati High Court chuan order chhuahin, Mizoram sorkar chu NLUP sem lo turin a hriattir nawn leh ta a ni.

NIB Vice Chairman chuan, High Court-a NLUP khin a ni chu NLUP tihbuai hrim hrim tumna nia sawiin, "Mi rethei rahbehna leh hmuhsitna a ni. Kan kal zel dawn," a ti a; tunah chuan tihbuai theih a nih tawh loh tur thu a sawi.