Tuirini lei dawhtu zinga hotu ber lakah Disciplinary proceedings lak tum a ni
Mizoram sorkar chuan Sesawng leh Khawruhlian inkara Tuirini lei chim chhuina chungchangah nimin khan thuchhuah a siam a; lei chim ta dawhtu zinga an hotu ber lakah disciplinary proceedings la turin sorkarin hma a lak mek thu a tarlang.
Sorkar thuchhuah chuan, February 13, 2018 zing dar 9:30 vela Tuirini lei chim chhui turin February 22-ah Aizawl DC Dr A Muthamma ruat a nih thu tarlangin, "Magisterial Inquiry bakah hian, 'Internal Departmental Inquiry' ti turin engineer thiam bik pathum chu March 20 khan ruat leh a ni a; Magisterial Inquiry latu hian amah pui turin IIT, Guwahati a ruat bawk," a ti.
Tuirini lei chim atanga hmalak dan
13.2.2018 - NH-150-a Tuirini lei (bailey bridge) chu chawhma dar 9:30 velah a chim.
22.2.2018 - Notification chhuahin Magisterial Inquiry ti turin Aizawl bawrhsap Dr A Muthamma, district magistrate ni bawk chu inquiry officer atan ruat a ni a, a hna thawk zo turin thla thum pek a ni.
20.3.2018 - Internal Departmental Inquiry din a ni a, master degree nei ṭhiau - H Zoramliana, Hrangthanga Zote leh R Lalpeka te chu thla thum chhhunga internal departmental inquiry thawk tura ruat an ni.
22.5.2018 - Magisterial Inquiry Report thehluh a ni.
30.5.2018 - Internal Departmental Inquiry Member Secretary-in an thawh hun chhung pawhsei an dil a, 15.6.2018 thleng hun pek an ni.
14.6.2018 - Sorkar hnenah Internal Departmental Inquiry thehluh a ni.
3.7.2018 - Aizawl District Magistrate-in IIT, Guwahati report buatsaih sorkarah a hlân.
16.7.2018 - Magisterial Inquiry Report leh IIT, Guwahati-in report an buatsaihte chu SE concerned hnenah pek a ni a. Ani hian sawi tur a nei a nih chuan report pahnih a hmuh aṭanga ni 15 chhungin representation a thehluh a ngai.
1.8.2018 - Concerned officer-in hun pek belh a dil.
8.8.2018 - Concerned officer ngenna angin 14.8.2018 thleng hun pawhseisak a ni.
3.8.2018 - Concerned officer-in representation a thehlut.
16.8.2018 - Concerned officer-in representation a thehluh chu concerned officer tana controlling officer K Lalsawmvela hnenah a ngaihdan lak turin pek a ni. Hemi rual hian Magisterial Inquiry report, IIT Guwahati report leh Internal Departmental Inquiry report pawh K Lalsawmvela pek tel a ni.
17.9.2018 - K Lalsawmvela'n a thil hmuh dan leh ngaihdante ziakin PWD Deputy Secretary hnenah a thehlut.
Thuchhuah chuan, mi ṭhenkhatin Magisterial Inquiry report a chhuak har tawh niin an ngai tih sawiin, "Magisterial Inquiry Report hi May 2018 khan dawn tawh a ni reng a; amaherawhchu, report pawimawh zawk, a technical lam report, IIT, Guwahati siam hi July 2018 khan dawn chauh a ni," a ti a; report-te chu sorkar tih dan phung pangngaiin a kaihhnawih officer hnenah pek niin, representation thehluh pawh pek a ni a, representation chu 3.8.2018-ah dawn a ni tih a tarlang.
Sorkar thuchhuah tarlan danin, representation thehluh chu lei chim laia a controlling officer hnenah pek niin, a ngaihdan zawh leh a ni a; controlling officer ngaihdan chu September 17-ah sorkarin a dawng.
Thuchhuah chuan, mi thenkhatin PWD Minister-in report a tikhawtlai anga an ngai chu a dik lo nia sawiin, "Tihkhawtlai emaw, hupbo turin chhan tur a nei lo," a ti a; Magisterial Inquiry Report leh Internal Departmental Inquiry Report bakah, IIT, Guwahati Report-te chu dawn kim a ni tawh a, zir chian mek a nih thu a tarlang.
Lei chim chhan takah mimal puh an awm chiah lo nia sawiin sorkar thuchhuah chuan, "Amaherawhchu, lei chim chhan ni chiah lo 'procedural lapse' eng emaw chu awm ngei niin a lang. Entirna'n, lei dawh a nih laiin mihring dannate pawh dah a ni lo niin a lang. 'Minor procedural deviation' pawh awm nia ngaih a ni. Report-te hian lei chim chhan tak sawi fak lo mah se, 'procedural lapse' leh 'minor procedural deviation' a awm takah chuan, lei dawhtu zinga an hotu ber lakah disciplinary proceedings draw turin sorkar chuan hma a la mek a ni," a ti.