YMA General Conference 2021 thlen dan tur MLA hoin sawiho

Kum 2021-a YMA General Conference thlengtu tur Bilkhawthlir khuaa Organising Committee hruaitute leh Serlui bialtu MLA Lalrinsanga Ralte te chu nimin khan Bilkhawthlirah an inkâwm a, YMA General Conference thleng tura hmalakna turte an sawiho.

Lalrinsanga Ralte chuan, Bilkhawthlir chu khaw taima leh intodelh khua an nih thu a sawi rualin, khaw chhung tihhmasawn erawh a ngaih thu a sawi a, "Bilkhawthlir khua hi khaw nuam leh a tlawhtute'n kal nawn an châk a, tlawh nuam an tih theih nan chei ṭhat a ṭul," a ti.

Bialtu MLA hian YMA General Conference 2021 Organising Committee hruaitute nen khaw chhung hmun hrang hrang an tlawh a; khaw chhung inkalpawhna (internal road) siam dan tur te, khualzinte hîp thei tura YMA Park chei dan tur te, conference pandal sakna tur field laih ṭhata zauh dan turte an enho a ni.

Lalrinsanga Ralte hian Bilkhawthlir leh Saiphai inkar kawng siam mek chu a hmun­ah a tlawh nghal a; kawngpui pawimawh, Bagha nena inkalpawhna ṭangkai tak a nih avangin tun ṭhál chhung ngeiin ṭha taka siam a nih theih nan uluk taka thawk turin thawk tute a chah.