Congress party-a vote thlak- te chuan hmasawnna an vote chhuak - Lal Thanhawla

Aizawl West-I Block Congress chuan nimin khan Luangmual YMA Hall-ah inkhawmpui an hmang a; an hun hmanpuitu MPCC president Lal Thanhawla chuan, Congress party-a vote thlakte chuan hmasawnna an vote chhuak dawn niin a sawi.

MPCC President chuan, Mizorama rotling hmasawnna awmte chu Congress mi leh sate vote chhuah a nih thu sawiin, "Congress-a in awm avangin ramin hma a sawn phah a ni. Hmathlir ṭha hruaitu in nei a, chhuan lo la kal zel turte tana ṭangkai tur an hmu phak a ni. Congress party-a vote inthlak hian hmasawnna in vote chhuak a ni," a ti.

Hydel project siam belh zel an tum vak tawh loh thu sawiin Lal Thanhawla chuan, "Hydel project hian ram a heh a ni. Kum 1998-ah khan tla lo ila chuan power-ah kan intodelh tawh ang; Tuivai a puitling ang a, Tuirial pawh a hma daihin a puitling tawh ang," a ti a; kum 10 MNF chu sorkar lo se power hralh chhuah tham siam chhuah a nih tawh tur thu a sawi.

Lal Thanhawla chuan, MNF-te'n kum 20 chhung ram páwn aṭangin ram an tichhe vek nia sawiin, "Mizo mipuite'n kan la duh tâwk lo emaw, kum 10 chhung kan sorkartir leh a ni. An sorkar chhungin ram chhung aṭangin ram páwna an awm lai aia nasain ram an tichhia. Chu'ngte chu siamṭha chungin hmachhawp kan nei zel a ni," a ti.

MPCC Communication chairman PC Laltlansanga pawhin thu sawiin, MNF policy SEDP-a cheng nuai thum sem an tiam chu a sem theih loh tih an hre chiang niin a sawi a, "Kan sorkar chuan MIP-ah Rs. 50,000 kan sem ang tih tiam a, an sorkara Rs. 4,500 den dena semtute kha an ni," a ti a; Congress party chu an sorkar leh ngei dawn niin a sawi.