Mizoramah voter 7,68,181 an awm ; Bru-te Mizoram páwna vote an thlak ECI-in a remti tawh dawn lo - CEO
Mizoram electoral roll thar, kumin Assembly inthlanpuia hman tur chu nimin khan district khawpui tinah DC/District Election Officer-te'n an tlangzarh a; Mizoramah voter 7,68,181 an awm. Mizoram chief electoral officer (CEO) SB Shashank chuan, electoral roll thar berah hian Tripura relief camp-a Mizoram mi Bru-te thun ni mah se, Mizoram páwna vote an thlak erawh Election Commission of India (ECI)-in a phal tawh lo tih a sawi.
Mizoram electoral roll thar berah hian voter mipa 3,74,496 leh hmeichhe 3,93,685 an awm a; mipa aiin hmeichhia 19,189-in an an tam zawk. Voter tamna ber district chu Aizawl niin, voter nei 2,88,322 an awm a; voter nei tlemna ber district - Siaha district-ah chuan voter 38,843 an awm thung.
CEO SB Shashank chuan nimin khan a pisaah thuthar thehdarhtute kâwmin, electoral roll thar tihchhuah tak chungchang leh electoral roll ennawnna kalpui dan a sawifiah a; Bru-te Mizoram páwn lamah vote thlaktir tawh lo turin ECI thuthlukna tarlan a nih tawh thu a sawi.
Hetih lai hian, Mizoram electoral roll thar berah hian Tripura relief camp-a Mizoram mi Bru-te thun an ni a; mahse, voter eng zat nge awm tih tarlan a ni lo.
SB Shashank chuan, Mizoram draft electoral roll chu July 31, 2018-ah mipui en theih tura târ chhuah a nih thu sawiin, "Draft roll hi political party-te pek a nih bakah, website-ahte târ chhuah a ni. July 31-August 21, 2018 chhung sawisel theihna hun leh siamṭhat ngaite siamṭhatna hun hawn a ni a, chumi hnuah tihfel ngaite tihfel leh niin, electoral roll thar ber hi tlangzarh theih a ni ta a ni," a ti.
CEO chuan, MLA inthlan lo awm tura an inbuatsaihna sawiin, "Polling booth leh polling station-te peih vek a ni tawh. EVM leh VVPAT-te pawh an awmna tur district-ah ṭheuh dah a ni," a ti a; inbuatsaihna chuan a vawrtawp a thlen mek thu a sawi.
Mizoram district tina voter zat
District Mipa Hmeichhia Total
Aizawl 1,36,732 1,51,590 2,88,322
Lunglei 52,155 52,775 1,04,930
Siaha 18,894 19,949 38,843
Champhai 41,933 42,837 84,770
Serchhip 23,917 25,053 48,970
Kolasib 27,832 29,325 57,157
Mamit 33,100 31,969 65,069
Lawngtlai 39,933 40,187 80,120
TOTAL 3,74,496 3,93,685 7,68,181