KHAWTHLIR

Candidate puang
PRISM party chuan nimin khan an pisaah Assembly inthlan huna an candidate turte an puan belh a; PRISM president Vanlalruata chuan, an general secretary Eddy Zosangliana Colney chu PRISM ticket-in Hachhek bialah a din dawn thu a puang. Vanlalruata chuan, “Eiru ve lo tur, bial mi ngei mai Hachhek bialin candidate an nei tur hi Hachhek bial mipuite ka lawmpui a ni,” a ti.

MLA-in hawng
Cheng nuai 481.52 senga sak Edenthar Veng Community Centre chu nimin khan bialtu MLA Lal Thanzara, minister-in a hawng. Minister chuan, hall hawn thar chuan nasa zawka khawtlang hmasawnna, inlungrualna leh thawhhona ṭha a thlen a beisei thu a sawi. Community Centre thar hi chhâwng li niin, cheng nuai 481.52 senga sak a ni a; badminton court, board games khelhna, parking, office pahnih leh skill development room-te a awm a ni.

Motor chesual
Nimin zing khan Seling Edenthar Veng aṭanga Aizawl lam km. 9 velah Getz car chesual hmuh a ni a, a khalhtu nia hriat R Lalzawmliana, Zarkawt (Art & Culture-a coordinator) chu thia hmuh a ni. Car chetsual lai hriat a ni lo a, R Lalzawmliana hi amah chauhin a chuang nia hriat a ni.

Heroin man
Excise & Narcotics department-a Anti-Narcotics Squad chuan nimin zing dar 3 vel khan Seling dáiah heroin gram 70 (hawng 5) leh a neitua puh SD Khuma (32) s/o Sawithuama, Kawlchaw West, Lawngtlai district-a nia inchhál an man. SD Khuma hi Narcotic Drugs & Psychotropic Substances Act, 1985 hmangin thubuai siamsak a ni.

Mizoramah Unicity
Unicity Presidential Ruby chuan an thil siam chhuahte Mizorama zawrh chhuah a nih thu, nimin khan Aizawl Press Club-ah an puang. Hemi chungchangah hian Unicity hotu Devendra Sharma chuan thuthar thehdarhtute a kâwm a; an company chu khawvela darh zau ber pawl a nih thu leh, scientist thiam tak takte'n an enkawlna hnuaiah thil chi 400 chuang an siam chhuah thu a sawi. Mizoram tan bika hre chiang duh tan phone 7600249653 leh 9430677864-ah zawhfiah theih a nih thu a sawi bawk.