Maxicab chuan man tihsân an phût ; Sorkar kar nan Oct. 3 aṭangin din an tum

Mizoram Maxicab Owners Association (MMCOA) chuan maxicab chuan man tihsan leh all Mizoram permit pek chhuah leh an phût a; he an thil phût tihlawhtling tura sorkar kar nan October 3, 2018 aṭangin Mizoram pumah maxicab-te tiam chin awm loa an din dawn thu an puang.

MMCOA hruaitute hian nimin khan Aizawl Press Club-ah thuthar thehdarhtute an kâwm a; an president C Lalthanmawia chuan, motor man te, a part man te, diesel mante a sàn tawh em avangin maxicab chuan man (rate) tisang turin State Transport Authority (STA)-ah vawi tam tak an thlen tawh a, Transport Minister leh Home Minister bakah, Chief Minister pawh vawi hnih an hmuh tawh thu sawiin, tun thlengin tihsan a la ni lo tih a sawi.

C Lalthanmawia sawi danin, kum 2013-ah diesel man litre khatah Rs. 41-43 a ni a, Sumo thar man Rs. 5,70,000-5,90,000 a ni. Tunah erawh chuan diesel man litre khatah Rs. 71.50 a ni a, Sumo thar man pawh Rs. 8,00,000 chuang a ni tawh.

April 2018-a MMCOA Special Assembly-in maxicab chuan man atan km. khatah metal road-ah Rs. 3 leh metal loh kawngah Rs. 3.50 ni turin an rel tih sawiin C Lalthanmawia chuan, "A hnua STA-in metal road-ah Rs. 2.50 leh metal lohah Rs. 2.75-in rate min siaksak a ni," a ti a; STA rate ang chuan an tlan theih loh thu leh, MMCOA Assembly-in rate a siam anga tlan an duh thu a sawi.

Mizoramah kum 1997-a maxicab tlan ṭan aṭanga All Mizoram Permit ni reng ṭhin chu kum 2016-ah tihtawp a ni a, route bik tan chauh permit pek a nih thu sawiin C Lalthanmawia chuan, "Emergency thilah te, chhiatni leh ṭhatni-ahte kawng dang leh district dangah tlan a ngaih chang a awm a, special road permit lak a ngai a, a buaithlak hle a ni," a ti.

Thihna leh damloh thilah thingtlang mite'n ambulance an hmang pha lo tih sawiin, "Tlawmngaia loh theih loha ruang phurin diatrict dangahte tlan a ngai a, MVI enforcement-in Rs. 2,000-te min chawitir ṭhin a, a ná kan ti hle a ni," a ti a; Special permit lak a buaithlak thu leh online hmanga dil theiha an tih pawh a tak takah a harsat thu leh, driver tam tak chu internet hmang ngai lote an nih thu a sawi.

MMCOA hruaitute chuanm man an nihna hmuna pawisa chawitir an nihin, an pawisa chawi chu sorkarah lut loin, enforcement duty-te ipte-ah a lut nia an hriat thu an sawi bawk.

An thil phût chungchanga Transport minister John Rotluangliana an hmuh ṭumin, 'Transport Minister ka nih chhung chuan All Mizoram Permit hi kan pe dawn tawh lo che u,' tia a lo chhan thu MMCOA hruaitute chuan an sawi a ni.