Champhaiah zirna-in leh sorkar pisate MZP-in vawiin aṭangin an khâr dawn

MZP Headquaters, Champhai hruaitute chuan nimin chawhma dar 10:30 khan Health minister Lal Thanzara chu a pisaah an hmu a, Champhai District Hospital-a doctor dah belh tura an phût chungchang an sawipui. An beisei ang thu lawmawm an dawn loh avangin vawiin aṭangin Champhaiah lungawi lohna an lantir tur thu an puang.

Champhai MZP thuchhuah chuan, Health Minister an hmuhnaah hian Health minister Lal Thanzara chuan, 'Champhaiin doctor chungchanga in harsatna chu kan hria a, Mizoramah hian doctor kan indaih lo hle a, theihtawp kan lo chhuah ang a, kan lo bawhzui dawn a nia,' tiin a lo chhang niin a tarlang a; "Hun hun rei tak ngenna kan thlen tawh chunga vawiin thlenga ngaihtuah mek a la ni hi a pawi kan ti a, lungawina tur pakhatmah kan hmuh loh avangin action plan kan lo siam tawh anga kal tlang ni se kan ti a ni," an ti.

Champhai MZP-in ruahmanna an siam dan chuan, vawiin Zirtawpni hian Champhaia zirna-in leh sorkar pisa zawng zawng an khâr dawn a, bank-te leh damdawi-in OPD erawh khâr a ni dawn lo.

October 1, Thawhṭanniah zirna-in leh sorkar pisa an khâr chhunzawm ang a, chu bakah chuan college leh higher secondary school zirlaite'n kawng an zawh dawn a ni. Chumi chhunga an ngenna a hlawhtlin loh chuan a ṭul anga total bandh huaihawt an tum bawk.