Children Science Congress neih a ni

Rashtriya Madhyamik Shiksha Abhiyhan (RMSA) bul tumin nimin khan Champhai, Serchhip leh Lawngtlaiahte district level Children Science Congress buatsaih a ni.

Children Science Congress hi Champhaiah chuan GM High School-ah neih a ni a, PHE executive engineer J Kapkima chu khuallian niin, zirlaite chu an talent leh hriatna pho chhuahna hun ṭha an nei chu an vanneihzia hriaa lawm nachang hre turin a chah a, "Kawng engkimah hlawhtling tur chuan taima taka tih hram hram a ngai," a ti.

Champhaiah hian sikul pakua aṭangin team 12 an tel a, senior level-ah Lalruatlawmi leh Nangngaihsangi, Bethel Mission School-te chu pakhatna an ni a, junior level-ah HVL Hruaitluanga leh Monica Lallawmkimi, Bethel Mission School-te pakhatna an ni.

Serchhipah chuan Children Science Congress hi BNRGSK Hall-ah neih a ni a; khuallian Lawm­awma, RMSA project director chuan, "Tunlai khawvel changkang tawh takah science & technology thiamna hmanga hmasawnna a nasain, chak takin a kal mek a, ram hmasawnna hna thawhna tur atan a ki pawimawh tak anih avangin sorkarin science subject hi a ngai pawimawh em em a ni," a ti.

Intihsiaknaah Serchhip khawpui leh a chhehvela high school panga leh middle school pahnih aṭangin zirlai naupangte'n initihsiakna an hmachhawn a ni.

Lawngtlaiah chuan Children Science Congress hi BRC Hall-ah neih a ni a, sikul pariat aiawh zirlai naupang 18-te'n 'Science, Technology and Innovation for a Clean, Green and Healthy Nation' tih thupui hmanga model leh presentation an siamte pho chhuakin an sawifiah a ni.