R Lalzirliana a lo kal ngei kan beisei - MNF Treasurer

MNF treasurer Vanlal­zawma chuan, Congress party-in an vice president an hnawhchhuah tak R Lalzirliana chu MNF-ah a luh ngei an beisei thu leh, MLA ni mek pathumin MNF an zawm thuai an beisei thu a sawi.

MNF Aizawl West-III Block-in nimina Khatla South YMA Hall-a joint meeting leh intuaitharna hun an buatsaihah thu sawiin Vanlalzawma chuan, "Tunlaiin nasa takin MNF boruakin hma a sawn a, tun hnai lawkah Pu Robert Romawia leh mi dang pawimawh tak tak kan lawm lut a ni. Chutih mek laiin, Congress vice president Pu R Lalzir­liana chu Congress

aṭangin an hnawtchhuak a, MNF-ah a lo kal ngei kan beisei mek bawk. Hengte ringawt pawh hian nasa takin MNF boruak a tikâng a, hma a sawntir nasa a ni," a ti.

Vanlalzawma chuan, MNF-in MLA panga an nei sa tih sawiin, "MLA pathum dang kan neih belh leh dawn niin kan hria a, inthlan hmain MNF-in MLA pariat neih theih mai kan inbeisei mek. MNF hi kan sorkar mai dawn tawh niin kan beisei ta," a ti a; Aizawl West-III bialah pawh an khingpuite'n tu pawh candidate-ah dah se, MNF-te'n theihtawp an chhuah phawt chuan chiang taka an chak tur thu a sawi.

MNF Treasurer chuan, Congress party chu kum 5 dang an sorkar leh chuan Mizoram tan mai ni lo, kohhran tan pawh a ṭha lo hle tawh dawn tih sawiin, "Kohhran mi tam tak, KṬP member thi an tam lutuk tawh a, an thih chhan chu zu a ni. Kan kawngpui a chhe em em tih kan hria, an siamṭha thei lo," a ti.