AMFU huaihawtin Kut hnathawktute'n kawng an zawh

All Mizoram Farmers Union (AMFU) chuan nimin khan Aizawlah 'Zoram kuthnathawktute chhanchhuahna kawng­zawh' an huaihawt a; mi ṭhahnem takin Chanmari kâwn aṭanga Vanapa Hall kawt thleng kawng an zawh.

AMFU chuan resolution pass in, an thil phûtah hian October 3, 2018 thleng sorkar ngaihchân ni se, an ti. October 3 thlenga sorkar aṭanga an beisei ang hmalakna mumal an hmuh loh chuan na zawka sorkar nawr nan darkar 24 chhung economic blockade huaihawt an tum thu an puang a ni.

AMFU president Joseph H Thanzuala chuan, November 12, 1994-a AMFU a din aṭanga kum 25 chhungin kawngzawh an huaihawt ang tih an rin ngai loh thu sawiin, "Lungawi loh chángte tam hle mah se, sorkar tha leh Pathian zarah kan la tuar chhuak ve em ang chu kan ti ṭhin. Tunah zet chuan hreh hle mah ila, ti lo thei lo, kawng zawh lo thei lo dinhmunah kan lo ding ta a ni," a ti.

Joseph H Thanzuala chuan, Congress party kaihhruai sorkarin 'Miretheite kan VIP' ti ṭhin mah se, mi rethei leh kut hnathawktute'n VIP enkawlna an dawng lo mai ni loin, an din khawchhuah hlauin sorkarin a siam tirethei zawk nia a lan thu a sawi a; "Kan ram rorel khawlte hi 'Rethei siamna khawl' an chang zo ta emaw tih tur a ni ta... Thlai min chìntir a, enkawl dan min zirtir a, kan thar ta chêng a, lehlam min hawisan leh hlauh zel si," tiin, sorkarin kut hnathawktute a enkawl dan chu Mizote hnama dintu Pathian duh zawng a ni lo tih a sawi.

AMFU hian Mizoram sor­karah thil phût an nei a; tun hnai kum li kal ta aṭang khan kut hnathawktute'n sawhthing an hralh theih loh avangin APMC Act/ APLM Act 2017 hnuaia regulated market kalpui a ṭul thu chief minister Lal Thanhawla leh hotu dangte an sawipui a ni. APMC Act chu kum 2008-ah MNF sorkar laia pass a ni a, Rules erawh an siam hman lo. CM Lal Thanhawla'n Commerce & Industries Commissioner chu thla hnih chhunga Rules siam turin a ti a, mahse, tun thlengin a la hlawhtling lo.

AMFU chuan Land Reform leh Agri­culture Marketing System (APMC Act/APML Act of 2017) chu August 2018 chhung ngeia tipuitling turin Mizoram sorkar an ngen a; tihhlawhtlin a nih loh avangin kawng an zawh ta a ni.

AMFU President chuan, Mizoram sorkar hotute chu APLM Act 2017 hnuaia regu­lated market leh land reform chu dan puitlinga siam turin an ngen nawn leh tih sawiin, "A hlawhtlinna kan hmu lo a nih chuan a ṭul ang zelin na zawka hmalak a ni ang. Hemi avang hian harsatna eng pawh lo thleng se, AMFU-in mawh a phur lo ang," a ti.

Nimina AMFU huaihawta kawngzawhah hian sawhthing pick-up phur khat an keng tel a, Vanapa Hall kawtah an bun a; kawngzawh tawp hnuah sawhthing chu a duh duhin an la a ni.