MPF VP-in party ruih-chilh lo turin mipui chah

MPF vice president Rev. B Sangthanga chuan, kumina Mizoram Assembly inthlanpui awm turah inthlan puan a nih hma aṭangin mi hausate'n an sum chelek nasat an tum tih thâwm a nasat thu a sawi a; Mizoram mipuite chu party ruihchilh lo a, ngaihtuahna fim tak nen ram roreltu tur thlang turin a chah.

MPF-in inthlanna thiang­hlim leh felfai, zalen a awm theihna atana hma an lakna tichaktu atana music video pathum an siam thar leh video clip an siamte nimina Aizawl Press Club-a a tlangzarhnaa thu sawiin Rev. B Sangthanga chuan, "Kumina inthlan turah hian mi hausate'n sum chelek nasat an tum tih thâwm a tam. 'Ding la, a senso ka tum ang' tia intihte a awm. Inthlana sum hman nasat ang chi hi MPF-in kan duh lo ber pakhat a ni a, sumin chhia leh ṭha hriatna a tihchhiat theihna hi kan duh loh a ni," a ti.

MPF Vice President chuan, ram hruaitu nih tum politician-te zingah thil ṭha, ram leh hnam dinchhuah duhna tak tak nei lo em maw ni tih turin party inelna, ṭawngkam ngaihthlak hrehawm leh ram hruaitute tana sawi âwm loh tak tak hriat tur a awm thu a sawi a, "A pawi hle. Ram tana thil ṭha tih duhna tak tak an nei lo em ni, anmahni dinchhuahna leh hausakna tur ringawt an ngauhtuah ta em ni? Ram leh hnam hruai tak tak tura Pathian ṭihna nena inpe kan mamawh," a ti a; ram hruai tum politician-te'n nasa zawk leh zau zawkin ngaihtuahna sêng se an duh thu a sawi.

Mizoram Synod-a executive secretary ni bawk Rev. B Sangthanga chuan, kumina inthlanpui awm turah Pathian ráwn chungin mi tinin an mawh­phurhna an hlen chhuah a pawimawh thu a sawi a; "Mipuite'n party ruihchilh loin ngaihtuahna i sêng ang u," tiin Mizoram mipuite chu ngaihtuahna fim tak nen Pathian ráwn chunga ram hruaitu thlang turin a sáwm a ni.