MPS-in secretary post an nawr dawn
Mizoram Police Service Association (MPSA) chuan nimin khan Police Headquarters-a Arya Mess-ah inkhawmpui an hmang a; MPS-te'n Mizoram sorkarah secretary post an neih theih nan hmalak an rêl.
Chawhma lama inkhawm chu MPSA president Lalbiakzama'n kaihruaiin, ro an rêl a; Mizoram sorkarah secretary post nei tura nawr ni rawh se, an ti. All India services separate state cadre kan neih theihna atan pawl dangte phungbawma sáwmin chak takin hmalak ni rawh se, an tih bakah, Mizoram police hnuaia zu leh ruihhlo laka buaina neite enkawlna tur ruahmanna siam turin hmalak ni rawh se, tihte an rêl bawk.
Chawhnuah MJA kaihhruaina hnuaiah kum 2018-20 chhunga an pawl office bearer tur an thlang a; president-ah Lalbiakzama, senior vice president-ah Zosangliana, vice president-ah C Lalnunmawia, general secretary-ah David H Lalthangliana, secretary-ah Lalṭhakima leh Vanlalliana, treasurer-ah Rex Zarzoliana Vanchhawng leh finnance secretary Lalrinawma Ṭaite te an thlang.
Zanah inkhawmpui an hman chhunzawm a, chief minister Lal Thanhawla, Home secretary Lalnunmawia Chuaungo leh DGP Balaji Srivastava ten an hmanpui a ni.