Mihring hmanga sumdawnna hi Ṭangruala do chi a ni - CM Hawla

Salvation Army, India Eastern Territory hnuaia Community Health Action Network (CHAN) chuan nimin khan Aijal Club-ah mihringa sumdawnna dona chungchanga inràwn­khawmna, 'State wise con­sultation meeting on human trafficking' an buatsaih a; khuallian Lal Thanhawla, chief minister chuan, mi­hringa sumdawnna chu ṭang­ruala do chi a nih thu a sawi.

Inrâwnkhawmna hi CHAN project director Maj. Lalliankunga'n a kaihruai a; Lal Thanhawla chuan, mihringa sumdawnna do kawngah sorkarin hma lain, nasa takin a thawk ṭhin niin a sawi a, "Chutih rual chuan, tlawmngai pawl leh vangtlang ang zawng pawha ṭangrual taka sualna hi kan do a ṭul," a ti.

Chief Minister chuan, mihring hmanga sumdawnna chu ram hmelma lian tak leh a do kawngah pawh ṭanrual ngai thil a nih thu sawiin, "CHAN-te'n hma an lo lak tawhna hi a fakawm hle. Retheihna te, awlái zawka sum hmuh duh vang te, thil chincháng hriat loh leh vanduaina hrang hrang vangin mihringa sumdawnnaa lut ta leh mahni laina hnaite pawh hralh an awm ṭhin," a ti.

Lal Thanhawla chuan, Mizoram pawh mihringa sumdawnnaah a him loh thu a sawiin, "India khawpui hmun hrang hranga Mizo welfare-te pawhin an lo buaipui fo tawh ṭhin. Vawiina inràwnkhawmna buatsaih ang hi thil ṭul tak a ni," a ti a; Mizoram chu Asia chhim­chhak ramte a hnaih zual avangin ruihhlo leh dan phal loh thil dangte lak luh a awlsam thu a sawi.

Workshop-a tarlan danin, kum 2005 aṭang­in Mizoramah human trafficking do letna hna ṭan a ni a, Salvation Army chuan kum 2009-ah ‘India Eastern Territory Anti-Human Trafficking Project’ an siam. He project hi United Kingdom-a Territory Salvation Army nen ṭangkawpin, phase-I ah Mizoram chhung mai ni lo, India hmarchhak state-a Moreh, Imphal, Churachandpur, Shillong, Guwahati, Siliguri, Fa­tapukur, Darjeeling, Kalim­pong leh Namchi-ahte hma­lak phawt a ni.

India Eastern Territory Anti-Human Trafficking Project phase-II kalpui mekah Mizoram district ṭhenkhat leh Assam leh West Bengal-te a huam a; ram páwnahte pawh an hmalakna avangin chhanchhuah hna thawkin an kal ṭhin. State páwna NGO hrang hrangte nen hmalakho ṭhin a nih bakah, Impulse NGO nen ṭangkawpin chhanchhuah hna thawhna kawngah awlsam zawka Myanmar leh Bangladesh a thawhpuite nen inbiakna tur hman mai communication software-te siam a ni bawk.