KHAWTHLIR

Beihpuit thlak
Excise & Narcotics department enforcement-te chuan Mizoram inthlanpui awm turah muanawm taka inthlan a nih theih nana an hmalakna kal zelah September 27, Ningani khan Phunchawng leh a chhehvela dan loa zu siamna hmun (factory) dap beihpui an thlak. Zu siamna zém 100 an ti­chhia a, rakzu litre 160 leh zu siamna bel set 14 an man bakah, zu bilh lai ṭín 3,000 an tichhia a ni.

GST meeting
Nimin khan video conferencing hmangin Goods & Service Tax (GST) chungchangah Union Finance minister Arun Jaitley hoin meeting neih a ni a, Taxation minister Lalsawta pawh a tel. Kerala state-in khuarel chhiatna an tawrh vanga an state chhunga 10% Cess on GST lâk an dil chu member-te'n an pawmpui.

Jubilee lawm
Bungtlang High School chuan nimin khan an din champha vawi 50-na, golden jubilee an lawm a, bialtu MLA Vanlalawmpuii Chawngthu-in a hmanpui. Minister Vanlalawmpuii chuan zirlaite fuihna thu sawiin, "Zirlai ni ringawt loin zirlai hlawhtling leh hmantlak, thiamna tak tak nei ni tura ṭan lak a ngai," a ti.

MLA-in hawng
Sihphir High School-a MLA fund hmanga basketball court siam thar chu nimin khan bialtu MLA R Lalrinawma'n a hawng. Basketball court hi cheng nuai 7.5 sênga siam a ni a, metre 31.7-a thui, metre 16.7-a zau a ni.

Serchhip inpeih
Kumina Assembly in­thlan awm tur atan nimin khan Serchhipa political party leh tlawmngai pawl aiawhte chu Serchhip DC Sangchhin Chinzah hoin a pisaah an inhmukhawm a; Bawrhsap chuan, an district chu inthlang tura an inpeih tawh thu a sawi.

Lungphûm phúm
Mission for Organic Value Chain Development (MOVCD-NER) kaltlanga hmalakna chi khat, Mission Organic Mizoram (MOM) hnuaia Reiek Block Turmeric Growers’ Society-in sawhthing sawngbawlna tur processing unit thar an din tur lungphùm chu Ningani khan Finance minister Lalsawta'n a phúm.