MNF leh Congress policy hi Samdala Policy - ZPM Sr. Vice Chairman

Zoram Peoples' Movement (ZPM) senior vice chairman Dr Kenneth Chawngliana chuan, Congress leh MNF policy-te chu sem policy a nih thu sawiin, "Sem policy hi ‘Samdala policy’ a ni" a ti.

Nimina ZPM pisaa in­khawm­ah thu sawiin Dr Kenneth Chawngliana chuan, Congress leh MNF party-te chuan sem policy - Samdala Policy an kalpui a, tunah pawh an inzawrh­na a la nih zel thu a sawi a, "Samdala policy hnuai­ah hian hnam nun a tlahniam a, nationalism a ṭhang duang thei lo a, kut hnathawkte leh miretheite tan phei chuan beh lehzualna chauh a ni," a ti a; ZPM chuan thlai thar rate siamin mipui huapzo leh hmasawnna tluan tling thawktu sorkar an din dawn tih a sawi.

Mizoram state nih hnua Congress-in kum 20 chhung leh MNF-in kum 10 leh thla sarih chhung Mizoram an enkawl chhungin project liante a huna thawh zawh a awm ngai lo tih sawiin Kenneth Chawngliana chuan, "Serlui-B HEP hi kum 29-ah an peih hman ṭawk a, Tuirial HEP hi compensation avangin kum 20-ah an zo hram bawk. Tuirial HHEP phei chu India rama unit cost (chhit man) sang ber a ni hial ang. A vanduaithlak hle a ni," a ti.

Mizoram inthlanpui awm turah Congress leh MNF party-te chuan an sorkar chhunga an thil lo tih tawhte an insawisiak dawn niin a sawi a, "Kum 31 zet state kan ni tawh a, he dinhmun aia sang hi India hnuaiah kan nei thei lo," a ti a; Congress leh MNF party-te kaihhruai Mizoram sorkar thlen chin chu a la hniam hle thu a sawi.

ZPM Sr. Vice Chairman chuan, State Referral Hospital chu prime minister HD Deve Gowda hun laia sorkar laipuiin a pawmpui a nih thu leh Shillong-a NEIGHRIMS nena a ruala pawm a nih thu a sawi a; kar hmasaah Election Commission of India hotute an hmuhnaah ECI hotute chuan, Mizoram inthlan hun tur chu tun September thla tawp emaw, October thla tîr lamah emaw puan a nih tur an lo hrilh niin a sawi bawk.