Inthlanah MNF vice president Tlanghmingthanga candidate a ni dawn lo

MNF party chuan nimin khan Lungleia Mizo Hnam Rûnah Campaign Directorate hawnna (kick-off) hun an hmang a, MNF general headquarters vice president R Tlanghmingthanga'n a hmanpui a; kumina Mizoram Assembly inthlanah candidate a nih ve dawn loh thu a sawi.

Party-a hruaitu zawng zawngte MLA/minister nih an tum vek ṭhinin harsatna a siam ṭhin tih sawiin R Tlanghming­thanga chuan, party office aṭanga minister leh MLA-te kal dan lo enpuitu tur an awm a ṭul an tih thu a sawi a, "Kei hi minister emaw, MLA emaw ni ve tawh loin, Mizo Hnam Runah, Pathian leh kan ram tan ṭhut ka lo tum ta a, chuvang chuan, kuminah hian MLA inthlanah ka in candidate ve dawn lo a ni," a ti.

MNF sorkar laiin an tih tur ngei ni si, an hriat loh vanga an tih lohte a sawm tih sawiin Tlanghmingthanga chuan, "Kan hnam sipai, martarte chhungkua kan lo hriat tâwk loh avangin kan member eng emaw zat chu lungawi loin kan siam a ni tih kan hriat hian a pawi kan ti vawng vawng a, ngaihdam kan dil a ni," a ti a; tunah chuan MNF chu a piang­thar tawh niin a sawi.

MNF Vice President chuan, Mizoram inthlan turah Pathian duh zawnga ram hruai tumtu MNF-te leh Pathian leh kohhran bakah NGO-te hmusittu Congress party an inbei dawn niin a sawi a; an innghahna 'Keini erawh chuan Lalpa kan Pa­thian hming kan lam zawk ang' tih chu hre reng tura an party mite chahin, "Hnehna chang ngei turin mahni hmazawn ṭheuhah theitawp kan chhuah a ṭul," a ti.