CM Hawla lakah PIL thehluh tum

Lalhriatrenga Chhangte (Hriata Chhangte), Serchhip chuan nimin khan Aizawl Press Club-ah thuthar thehdarhtute a kâwm a; chief minister Lal Thanhawla lakah Gauhati High Court-ah public interest litigation (PIL) a thehluh dawn thu a sawi.

Hriata Chhangte chuan, inthlana nomination paper-ah affidavit-a a tarlan miah lohin Lal Thanhawla'n Kolkata-ah in cheng nuai 500 hû a sak thu sawiin, "Mipui sum tam lutuk a eiruk a chhapah, mi pangngai tan chuan han zah ve deuh a, inthlahrun ve awm tak tawh tura kan ngaih laiin, ani lah chuan rem leh rem lo pawh ngaihtuah loin 'Cheng khatmah ka ei ru lo' a ti a ni," a ti.

Lal Thanhawla chu a sum lak luh leh thil neih in mil lo (disproportionate assets) chungchangah May 20, 2018 khan ACB-ah FIR a thehluh thu sawiin Hriata Chhangte chuan, "ACB ho hian Chief Minister meuh corruption case-a investigation ti tur chuan Vigilance department-ah clearance an lak hmasak leh phawt a ngai a ni," a ti a; ACB-te chuan Chief Vigilance Officer hnenah clearance an dil hlawhtlin theih loh thu a sawi.

Hriata Chhangte chuan, Vigilance department changtu Chief Minister-in ACB-te clearance a pek duh loh thu sawiin, "Tunah chuan kawng dang a awm ta lo. High Court-ah writ petition (PIL) thehlut lo thei loin ka awm ta a ni. PIL hi inthlan zawhah nge, inthlan hmain ka thehlut ang tih ka ngaihtuah mek a ni," a ti.