National Nutrition Month pualin kawngzawh

Social Welfare department buatsaihin nimin khan hriselna lama hmasawnna tura kawngzawh, ‘Poshan Rally on National Nutrition Month’

(Rashtriya Poshan Maah) neih a ni a, Vanapa Hall aṭanga Millennium Centre thleng kawng an zawh. He hun hi Social Welfare minister PC Lalthanliana leh Health minister Lal Thanzara ten an hmanpui a; thupui chu ‘Eat healthy, healthy nation’ tih a ni.

PC Lalthanliana chuan, Poshan Abhiyan (National Nutrition Mission) chu kumin March 8-ah prime minister Narendra Modi-a'n a tlangzarh thu sawiin, "A tum ber chu naupang zinga ṭhanṭhû, ei chhiat vanga tlakchham natna vei, nau piang hlim zâng lutuk leh thisen sen tlâkchham tihtlem a ni. India ramah naupang ṭhang ṭha lo 38.4% an awm a, Mizoramah chuan 28% an awm," a ti.

Social Welfare Minister chuan, naupangte an ṭhan ṭhat loh chhan chu chaw an ei ṭhat tâwk loh vang a ni tih hmuhchhuah a nih thu sawiin, "Poshan Abhiyan hnuaiah uluk lehzualin naupangte hriselna endik a ni dawn. Uluk takin naupangte ṭhan dan endik nan khawl hrang hrang san zawng tehna (stadiometer), nausen sei zawng tehna (infantometer), rih zawng tehna (mother and child weighing scale) anganwadi centre-ah pek vek a ni dawn," a ti a; Poshan Abhiyan atana thawk tur mi 59 lak tawh a nih thu a sawi.

Minister Lal Thanzara chuan, September thla pum chu Rashtriya Poshan Maah (National Nutrition Month) atana hman a nih thu sawiin, "Hemi chhung hian village, block, district leh state level-ah nasa takin hmalak a ni. Nutrition Month bik kan hmang zo dawn ta a, hemi thla chiaha hmang loin, department hrang hrang leh mipuite kan ṭan tlan zel a ngai a ni," a ti a; thawktute chu inthlahdah loa ṭang zel turin a fuih.

Integrated Child Development Services (ICDS) chuan kum tin September 1-7 chhungin ‘Nutrition Week’ an hmang ṭhin a; kuminah hian September pum ‘Nutrition Month’ atan hman a ni. March 8, 2018-ah khan India ramah National Nutrition Mission ‘Poshan Abhiyan’ kalpui ṭan a ni a; kum 2019-ah chuan Mizorama district zawng zawng tuam vek tum a ni.

National Nutrition Mission ‘Poshan Abhiyaan’ hnuaiah hian community based education - anganwadi centre tinah khawtlang mipuite zirtirna pek a ni a, thupui hrang hrang a awm. He Mission hi kum 2022 thleng awh tur a ni.

Nimina kawngzawhah hian Social Welfare leh Health department-a thawk te, anganwadi worker te, health worker-te leh sikul naupangte an tel. Nimin veng khan district hrang hrangah National Nutrition Month kharna inkhawm hman a ni bawk.