Kum 2021-ah cyber crime Thubuai 482 ziah luh a ni

Home department chuan nimin khan Taxa­tion department audi­torium-ah internet kaltlanga pawikhawihna (cyber crime) laka mipui himna tur inzirtirna, Cyber Jagrookta Diwas an buatsaih a, Home minister Lalchamliana'n a hmanpui. Kum 2021 khan cyber crime vangin thubuai 482 ziah luh a nih thu an tarlang.

Home minister Lal­chamliana chuan, thiam­na sang zelah information technology a ṭhang nasa tih sawiin, "Kan chhawr ṭangkai em em a, thil tih a awlsam phah viau lai hian, bumna lakah kan fimkhur erawh a ngai," a ti a; inbumna laka inven thiam nan Cyber Jagrookta chu India ram pumah buatsaih a nih thu a sawi.

Lalchamliana chuan, website hrang hrang bakah, net banking, online shopping, online games leh social media application hrang hrang Mizo mipuiin an hmang ṭangkai em em tih sawiin, "Amaherawhchu, keini aia thiam zawk leh hre ril zawk, kawng dik lo záwnga hmang duhtute'n inbumna chi hrang hrang rawn duang chhuakin mi tam tak an bum tawh a ni," a ti.

Inkhawma tarlan danin, cyber crime chu hlawm lian pali-ah ṭhen a ni a - financial fraud (pawisaa inbumna), computer/data hacking (mi website tihchhiat/tihdanglam), privacy (mimal thuruk rûksak, thlalak leh video laka tihchhuaha vauna) leh cyber terrorism (internet kaltlanga invauna hrang hrang, mi firfiakte'n mi fuihpawrh thei leh rilru chawk tho thei thil an dahte) a ni.

Mizoram police-a SP (Crime) hnuaiah Cyber Crime Police Station a awm a, kum 2021 chhung khan cyber crime kaihhnawihah FIR 482 thehluh a ni. Cyber Jagrookta Diwas-ah hian Home secretary Vanlalngaihsaka, DIG Lalbiakthanga Khiangte leh sorkar hotute bakah, college leh sikul zirtirtute leh tlawmngai pawl hrang hrang aiawhte an tel.